Skip to main content Skip to page footer
Urubuga rwemewe rwa Leta y’u Rwanda
Akarere ka Musanze

Umuganda rusange usoza Nyakanga 2026 wabereye mu Mirenge yose y’Akarere ka Musanze

25 July 2026

Uyu munsi, ku wa gatandatu tariki ya 25 Nyakanga 2026, Umuganda rusange usoza ukwezi kwa Nyakanga 2026 wabereye mu Mirenge yose igize Akarere ka Musanze.

Ku rwego rw’Akarere, uyu muganda wayobowe n’Umuyobozi w’Intara y’Amajyaruguru, Bwana Mugabowagahunde Maurice, ari kumwe n’abayobozi batandukanye, barimo abagize Komite Nyobozi y’Akarere ka Musanze, bayobowe n’Umuyobozi w’Akarere, Bwana Nsengimana Claudien. Bifatanyije n’abaturage bo mu Akagari ka Cyabararika, Umurenge wa Muhoza, mu bikorwa byo gusukura imiyoboro y’amazi no gukuraho ibizitira inzira z’amazi ahindurirwa mu byobo biyobora amazi, ku muhanda ufite uburebure bwa kilometero imwe.

Iki gikorwa cyari kigamije koroshya imigendekere y’amazi y’imvura no gukumira iyangirika ry’umuhanda rishobora guterwa n’amazi menshi atabasha kubona inzira. 

Nyuma y’Umuganda, habaye umuhango wo gushima no guhemba Imirenge yitwaye neza mu bikorwa by’Umuganda mu mwaka w’ingengo y’imari wa 2025/2026. Uyu muhango wayobowe n’Umuyobozi w’Intara y’Amajyaruguru, Bwana Mugabowagahunde Maurice, afatanyije n’uhagarariye Minisiteri y’Ubutegetsi bw’Igihugu ndetse n’Umuyobozi w’Inkeragutabara mu Ntara y’Amajyaruguru, Lt. Col. Charles Kamali.

Imirenge ya Remera, Gataraga na Kimonyi yashimiwe kuza ku myanya ya mbere mu mihigo y’Umuganda mu mwaka w’ingengo y’imari wa 2025/2026. 

Mu nama yabye nyuna y’umuganda, abayobozi bakanguriye abaturage kwiyandikisha no gutanga umusanzu w’ubwisungane mu kwivuza w’umwaka wa 2026/2027, kugira ngo buri muturage abashe kubona serivisi z’ubuvuzi igihe azikeneye.

Hanasabwe gukomeza gushyira imbaraga muri gahunda ya #IsukuHose, by’umwihariko kwita ku isuku n’umutekano w’ibiribwa n’ibinyobwa bitangwa mu birori n’ahandi hateranira abantu benshi.

Abaturage n’abayobozi kandi basabwe gukomeza ubufatanye mu gukumira no kurwanya ibyaha, harimo n’icyaha cy’icuruzwa ry’abantu, no gutanga amakuru ku gihe kugira ngo ibishobora guhungabanya umutekano w’abaturage bikumirwe.