Akarere ka Musanze na RURA baganiriye ku ishyirwa mu bikorwa rya gahunda y’ingendo zo mu mujyi wa Musanze

Ubuyobozi bw’Akarere ka Musanze n’Urwego Ngenzuramikorere, RURA, bagiranye inama ku ishyirwa mu bikorwa rya gahunda y’ingendo zo mu Mujyi wa Musanze no mu nkengero zawo, izwi nka "Circulation en Ville.” Iyi nama yaberey i Kigaki kuri uyu wa Kabiri tariki ya 29Nzeri 2026.

Iyi nama yayobowe na Visi Meya Ushinzwe Iterambere ry’UbukunguMadamu Uwanyirigira Clarisse, ihuza itsinda ry’abahagarariye Komite ishinzwe kuvugurura Umujyi wa Musanze, Umuyobozi wa PSF mu Karere ka Musanze, n’Abakozi b’Akarere mu Ishami rishinzwe iibikorwa remezo.

Ku ruhande rwa RURA, inama yayobowe na Bwana Rugigana Evariste, Umuyobozi Mukuru wa RURA, n’itsinda yari ayoboye.

Abitabiriye inama baganiriye ku ngamba n’imyiteguro yo gushyira mu bikorwa gahunda nshya y’ingendo mu Mujyi wa Musanze no mu nkengero zawo, hagamijwe kunoza serivisi z’ubwikorezi rusange no korohereza abaturage mu ngendo zabo.

Hemejwe ko iyi gahunda izatangira gushyirwa mu bikorwa mu kwezi k’Ukuboza 2026, aho hazakoreshwa uburyo bwo kwishyura hadakoreshejwe gutanga amafaranga mu ntoki (cashless), ahubwo hifashishijwe ikoranabuhanga rya Tap&Go. 

Iyi gahunda izafasha mu kunoza uburyo bw’ingendo rusange mu Mujyi wa Musanze no mu nkengero zawo, ndetse no guteza imbere serivisi z’ubwikorezi zinoze kandi zishingiye ku ikoranabuhanga.