Abunzi 83 bashyikirijwe telefoni zigezweho zizabafasha kunoza imikorere

Ku bufatanye na Minisiteri y’Ubutabera, Abunzi 83 bahagarariye abandi ku rwego rw’Akagari n’Umurenge mu Karere ka Musanze bashyikirijwe telefoni zigezweho (smartphones), zizabafasha kurushaho gukoresha ikoranabuhanga no kunoza imikorere mu nshingano zabo.

Uyu muhango wayobowe n’Umuyobozi w’Akarere ka Musanze, Bwana Nsengimana Claudien, washimye uruhare rw’Abunzi mu gufasha abaturage kubona ubutabera bwubakiye ku bwumvikane no mu gukemura amakimbirane mu buryo bw’amahoro.

Mu butumwa bwe, Bwana Nsengimana Claudien yabwiye Abunzi ko ari indorerwamo y’ishusho y’ubutabera bw’igihugu, abasaba kurangwa n’ubunyangamugayo, ubunyangamugayo n’ubushishozi mu ishyirwa mu bikorwa ry’inshingano zabo.

Yabasabye kandi gukomeza gukora ibishoboka byose mu gukumira ibyaha, gukumira inzika no kwimakaza amahoro mu baturage bakorera, kuko ari abafashanyumvire bafite uruhare rukomeye mu kubaka umuryango urangwa n’ubwumvikane n’imibanire myiza.

Umuyobozi w’Akarere kandi yabasabye gukomeza kwegera abaturage no kubafasha gusobanukirwa gahunda za Leta, by’umwihariko kubakangurira kwishyura umusanzu w’ubwisungane mu kwivuza (Mituweli), kugira ngo abaturage babashe kubona serivisi z’ubuzima mu buryo bworoshye.

Abunzi bashyikirijwe izi smartphones bazakomeza kuzifashisha mu kunoza imikorere yabo, gukoresha ikoranabuhanga mu kazi no kurushaho gutanga serivisi zinoze ku baturage.