Abasenateri basuye urugomero rwa Mukungwa I, baganira n’abaturage ku ikwirakwizwa ry’amashanyarazi

Ku munsi wa kabiri w’uruzinduko rwabo mu Karere ka Musanze, rwatangiye ku wa 23 Nyakanga 2026,  Abasenateri Hon. Dr. Nyinawamwiza Letitiae na Hon. Dr. Frank Habineza, bagize Komisiyo ya Sena y’Ubukungu n’Imari, basuye ibikorwa by’umushinga w’amashanyarazi mu Murenge wa Rwaza, hagamijwe kureba aho amashanyarazi akomoka n’uko agezwa ku baturage.

Aba Basenateri bari kumwe n’Umuyobozi w’Akarere ka Musanze, Bwana Nsengimana Claudien, basuye urugomero rwa Mukungwa I, rufite ubushobozi bwo gutanga amashanyarazi angana na MW 12, akomoka ku mbaraga z’amazi.

Muri uru ruzinduko, Komisiyo ya Sena yasobanuriwe imikorere y’uru rugomero, uburyo amashanyarazi akorwa ndetse n’uko atwarwa akagera ku baturage. Ibi byari bigamije kumenya aho amashanyarazi agezwa ku baturage aturuka, gusuzuma imbogamizi zishobora kubangamira ikwirakwizwa ryayo no kureba ingamba zakwifashishwa mu kuzikemura.

Nyuma yo gusura urugomero rwa Mukungwa I, Abasenateri bagiranye inama n’abaturage bo mu Tugari twa Nyarubuye, Musezero na Kabushinge, ku biro by’Umurenge wa Rwaza. Muri iyi nama, abaturage baganiriye n’Abasenateri ku bijyanye n’uko amashanyarazi abageraho, bagaragaza ibibazo n’imbogamizi bahura na zo mu bijyanye n’ikwirakwizwa ry’amashanyarazi, ndetse banatanga ibitekerezo byafasha mu gukemura ibyo bibazo.

Uru ruzinduko rwa Komisiyo ya Sena rwatumye hamenyekana neza ibibazo abaturage bafite mu kubona amashanyarazi, ndetse runatanga umwanya wo kungurana ibitekerezo ku ngamba zafasha kwihutisha ikwirakwizwa ry’amashanyarazi no kuyageza ku baturage benshi, hagamijwe guteza imbere imibereho myiza n’iterambere ry’ubukungu.