Kuwa kane tariki ya 13/10/2022 mu Karere ka  Musanze mu Mujyi wa Musanze n'inkengero zawo habereye isiganwa ry'amagare asanzwe ya "pneus ballons" yateguwe ku bufatanye bw'Akarere ka Musanze, Koperative y'Abatwara abagenzi n'imizigo ku magare yo  mu Karere ka Musanze "CVM", Ishyirahamwe ry'umukino w'amagare mu Rwanda "FERWACY", Polisi y'Igihugu n'abafatanyabikorwa batandukanye mu byiciro by'abikorera bo mu Karere ka Musanze nka CETRAF, CANAL+ Rwanda, JIBU, UMWENYA, NEXT BAR n'abandi.

Abarushanyijwe bakoze urugendo rwa 28Km rwakorewe  mu kuzenguruka mu mihanda mishya ya kaburimbo mu Mujyi wa Musanze iherereye mu  Kagari ka Mpenge, Umurenge wa Muhoza. Abashyitsi bakuru bitabiriye  iri siganwa barimo  Umuyobozi w'Akarere ka Musanze Bwana RAMURI Janvier, Umuyobozi w'Ishyirahamwe ry'umukino w'amagare mu Rwanda "FERWACY" Bwana  MURENZI Abdallah, Umuyobozi wa Polisi y'Igihugu mu Karere ka Musanze SP Elvis MUNYANEZA, abahagarariye inzego zitandukanye z'umutekano n'abaturage benshi bagaragaje urukundo bafitiye umukino w'amagare ku buryo bushimishije.

Iri siganwa ryitabiriwe n'abatwara amagare 40 harimo ab'igitsina gabo 38 n'ab'igitsina gore 2 b'abanyamuryango ba CVM. Isiganwa ryakozwe mu mutekano usesuye cyane ko nta n'impanuka n'imwe yigeze igaragara. 

Abitwaye neza muri iri siganwa hahembwe uwabaye uwa mbere mu bagabo NTAKIRUTIMANA Joseph w' imyaka  21 wakoresheje iminota 51 n'amasegonda 25, uwa kabiri TUYIRINGIRE  w' imyaka 23 wakoresheje iminota 51 n'amasegonda 29 n'uwabaye uwa gatatu NIYONTEZE Prince w' imyaka 21 wakoresheje imonota 51 n'amasegonda 34. Hanahembwe uwitwaye neza mu bakiri bato witwa TUGIRINSHUTI Fabrice w'imyaka 19 waje ku mwanya wa 9 akoresheje iminota 54 n'amasegonda 04.

Mu b'igitsina gore bitabiriye iri siganwa uwa mbere ya UWIMBABAZI Rillianne wakoreshe isaha imwe, iminota 6 n'amasegonda 07 naho uwaje ku mwanya wa kabiri yabaye NYIRABASHAKIMANA wakoresheje isaha imwe, iminota 18 n'amasegonda 30. Mu bihembo byatanzwe harimo  amagare 04 icupa rya gaz 01 n'ishyiga ryayo, decoderi 03 za CANAL+ n'ibindi bihembo bitandukanye byatanzwe n'abikorera.

Mu butumwa bwe, Umuyobozi w'Akarere ka Musanze bwana RAMURI Janvier yijeje abanya Musanze ko azakomeza gushyigikira Siporo mu byiciro byose kandi yizeza Umuyobozi wa FERWACY ko igihe cyose bazategura amarushanwa mu Karere ka Musanze Abaturage bose bazabashyigikira. Umuyobozi wa Ferwacy yemeye gukomeza gushyigikira umukino wa magare mukarere ka Musanze ategura hategurwa amarushanwa atandukanye akaba yaranemeye ko mu minsi iri imbere isoza umwaka bagiye Gutegura irindi rushanwa rizasusurutsa abaturage ba Musanze.

Kuri uyu munsi kandi, aasiganwa n'abafana b'umukino w'amagare bahawe ikiganiro gifite insanganyamatsiko igira iti: "Rubyiruko twirinde Ibiyobyabwenge kuko bidindiza iterambere ryacu". Ikiganiro cyatanzwe n'Umuyobozi w'Ishami ry'Imiyoborere Myiza mu Karere ka Musanze Bwana TWIZERIMANA Clement. Iri siganwa ryatangiye saa 11h00 risozwa saa 14h00.

KAMANZI Jean Bosco

Ag PRMCO