“UWEZO Youth Empowerment” ni umwe mu Bafatanyabikorwa b'Akarere ka Musanze, ukaba  ari Umuryango Uharanira Uburenganzira bw'Abana n'Urubyiruko Bafite Ubumuga binyuze mu Mishinga itandukanye irimo na "WASH Project" yita ku Isuku n'Isukura by'umwihariko ku Bana b'Abakobwa biga n'abatiga, baha ubufasha bw'ibikoresho bitandukanye birimo n'by'isuku yihariye ku bageze mu gihe cy'imihango,  bageraho bifashishije Abafashamyumvire bafite mu Mirenge bakoreramo, nabo babifashijwemo n'Abayobozi b'Ibigo by'Amashuri n'Inzego z'Ibanze.

Ni muri urwo rwego, hagamijwe gusangira amakuru ku bikorwa bimaze kugerwaho n'uyu Mushinga mu gihe cy'imyaka umaze ukorera muri aka Karere, imbogamizi zihari n'ingamba zo gukomeza ibyagezweho mu gihe uyu Mushinga uzaba usojwe, kuri uyu wa Kane tariki ya 27 Gicurasi 2021, kuri Home Inn Hotel, habereye inama yahuje Ubuyobozi bw'Akarere ka Musanze, bwari buhagarariwe n'Umuyobozi w'Ishami ry'Imibereho Myiza mu Karere, Bwana NTIRENGANYA Martin, Umuyobozi Wungirije wa  UWEZO, Abayobozi n'Abakozi mu Mashami atandukanye mu Karere (Ishami ry'Iterambere ry'Imibereho Myiza, Uburezi, Ubuzima, Igenamigambi n'Imiyoborere Myiza), Polisi (Sgt NYIRABAHUFITE Solange), Umuhuzabikorwa w'Inama y'Igihugu y'Abantu Bafite Ubumuga mu Karere, Madamu MUKANYEMAZI Adele, Abayobozi b'Ibigo by'Amashuri uyu Mushinga ukoreramo, Abafashamyumvire bawo na bamwe mu Babyeyi b'Abana ukurikirana.

Ukorera mu Bigo 6 aribyo GS GASHANGIRO II, GS MUHOZA I, GS KABAYA, GS KAGANO, GS NYANGE na CS RUHENGERI (EER). Aha hose bakaba bishimira intambwe imaze guterwa kubera ko UWEZO yabafshije gushyiraho Clubs z'Isuku n'Isukura, gukuraho imbogamizi zadindizaga imyigire y'abana bafite ubumuga muri rusange n'abana b'abakobwa by'umwihariko, kuzamura ubusabane n'ubwuzuzanye ku bana bafite ubumuga n'abatabufite, kugabanya umubare w'abana bafite ubumuga bataga ishuri, ubuvugizi ku bana bakeneye kujya kwiga mu Bigo byihariye bitewe n'urwego rw'ubumuga bafite, kwita ku bana barerwa na ba Marayikamurinzi, n'ibindi.

Impande zombi zishimiye imikorere n'imikoranire bikomeje kurangwa hagati yazo hanafatwa ingamba zizatuma izi mbuto zigera mu Mirenge yose kugira ngo ijwi ry'abana n'urubyiruko rufite ubumuga, n'abantu bafite ubumuga muri rusange rirusheho kumvikana, by'umwihariko bihereye mu miryango bakomokamo.

Mu izina ry'Ubuyobozi bw'Akarere, Bwana NTIRENGANYA Martin atangiza inama

Uhagarariye UWEZO asubiramo amavu n'amavuko y'uyu Mushinga n'ibyo umaze kugeraho

Umwe mu Bayobozi b'Amashuri arata ibyiza by'uyu Mushinga birimo n'ubusabane bw'abana mu Kigo

Mu matsinda: Abitabiriye barebera hamwe ibyagezweho, imbogamizi, ingamba mu guhangana nazo no mu gusigasira ibyagezweho mu gihe umushinga waba usoje

Umuyobozi w'Ishami ry'Uburezi, Bwana MUNYAMAHORO Alexis ashimira Abafatanyabikorwa anabizeza kubyaza umusaruro imbuto babibye