Umuyobozi w'Akarere Nsengimana Claudien yakiriye itsinda ry’abadepite bo muri Komisiyo y'Ubumwe bw'Abanyarwanda, Uburenganzira bwa Muntu no Kurwanya Jenoside mu Nteko Nshingamategeko y’u Rwanda, basuye Akarere muri gahunda y'ingendo z'abadepite bagize iyo komisiyo zigamije kubona amakuru y'inyongera ku ruhare rw'inzego z'ibanze n'abafatanyabikorwa bazo mu gusigasira ubumwe n'ubudaheranwa by'Abanyarwanda.  

Iyi komisiyo yari ihagarariwe na Depite Mukamana Alphonsine ari kumwe na Depite Mushimiyimana lydie, bagiranye inama n'abayobozi mu byiciro bitandukanye harimo n'inzego z'umutekano, inama yibanze ku kugaragariza abadepite ishusho rusange y'uko Akarere ka Musanze gahagaze mu gushyira mu bikorwa Politiki y'Igihugu y'Ubumwe n'Ubwiyunge. Abitabiriye iyi nama batanze ibyifuzo-nama ku kurushaho gusigasira ubumwe n'ubudaheranwa by'Abanyarwanda.

Abadepite bagize Komisiyo y'Ubumwe bw'Abanyarwanda, Uburenganzira bwa Muntu no Kurwanya Jenoside bari mu ngendo  hirya no hino mu gihugu, zigamije kubona amakuru y'inyongera ku ruhare rw'inzego z'ibanze n'abafatanyabikorwa bazo barimo inzego za Sosiyete Sivile, iz'abikorera n'umuryango nyarwanda muri rusange mu gusigasira ubumwe n'ubudaheranwa by'Abanyarwanda. 

Muri izi ngendo, abadepite barifuza kumenya uruhare inzego z'ibanze n'abandi bafatanyabikorwa bagira mu ishyirwa mu bikorwa rya Politiki y'Igihugu y'Ubumwe n'Ubwiyunge y'umwaka wa 2020; Kumenya imikorere ya gahunda z'isanamitima no gukira ibikomere byatewe n'ingaruka za Jenoside yakorewe Abatutsi mu 1994; Kumenya uburyo abarangije ibihano ku cyaha cya Jenoside yakorewe Abatutsi mu 1994 basubizwa mu buzima busanzwe.

Barifuza kandi kumenya uruhare rw'ibikorwa bihuriweho n'ibyiciro bitandukanye by'Abanyarwanda mu gushimangira ubumwe n'ubudaheranwa byabo (Amashyirahamwe, Clubs, Imidugudu, n'ibindi.); Kumenya imibereho y'imiryango y'abarokotse Jenoside yakorewe Abatutsi mu 1994 batishoboye no Kugaragarizwa ahakiri inzitizi zikwiye kwitabwaho mu gushyira mu bikorwa Politiki y'Ubumwe n'Ubwiyunge.