Ku gicamunsi cyo kuri uyu wa  Kabiri tariki ya 22 Mata 2026, ku  rwibutso rw'Akarere Cour d'Appel de Ruhengeri habereye igikorwa cyo Kwibuka ku nshuro ya 32 Jenoside yakorewe Abatutsi mu 1994, cyateguwe n'Urubyiruko rw'Abakorerabushake. Iki gikorwa cyitabiriwe n'Abayobozi batandukanye barangajwe imbere na Guverineri w’Intara y’Amajyaruguru Mugabowagahunde Maurice.

Iki gikorwa cyabanjirijwe n'Urugendo rwo Kwibuka rwatangiriye mu mujyi, ku isoko rya GOICO, rusorezwa ku Rwibutso rw'Akarere Cour d'Appel de Ruhengeri, aho Abayaobozi mu nzego zinyuranye, n'urubyiruko bunamiye inzirakarengane z'Abatutsi ziruhukiye muri uru Rwibutso.

Atanga ikaze, Umuyobozi w'Akarere Nsengimana Claudien yihanganishije Abarokotse Jenoside yakorewe Abatutsi, abifuriza gukomera. Yavuze ko twaje Kwibuka,kuzirikana no guha icyubahiro inzirakarengane zishwe urw’agashinyaguro, by’umwihariko urubyiruko rwambuwe ubuzima ruzira uko rwavutse.

Mu butumwa bwe, Guverineri Mugabowagahunde yasabye urubyiruko kwihatira kumenya amateka binyuze mu gusura inzibutso za Jenoside yakorewe Abatutsi, kwirinda ingengabitekerezo ya Jenoside, kwimakaza ubumwe n'ubudaheranwa no kugira uruhare muri gahunda ya Ndi Umunyarwanda.

Visi Perezida wa Ibuka_Mu Karere ka Musanze Karemanzira Fidele yavuze ko Jenoside yasize igihugu gifite imfubyi n'abapfakazi benshi cyane, itera ubukene mu miryango y'abarokotse Jenoside yakorewe Abatutsi, kisigi ibikomere ku mubiri no ku buzima bwo mu butwe.

Yavuze kandi ko Leta y'Ubumwe bw'Abanyarwanda itarebereye ahubwo yabaye mu mwanya w'umubyeyi, ifasha abana, abapfakazi n'inshike gukemura ibibazo bitandukanye birimo kubona amacumbi, amafaranga y'ishuri n'uburyo bwo kwivuza.

Mu butumwa bwe, Umuhuzabikorwa w'Urubyiruko rw'Abakorerabushake mu Karere ka Musanze Byiringiro Robert yavuze ko umuco w'ubukorerabushake bawukomora ku Nkotanyi zabohoye Igihugu, zigahagarika Jenoside yakorewe Abatutsi.

Kuri uyu munsi, Urubyiruko rw'Abakorerabushake rwo mu Karere ka Musanze rworoje inka Umusaza wo mu Murenge wa Muhoza , warokotse Jenoside yakorewe Abatutsi, mu rwego rwo kumufasha kurushaho kwigira no kwimakaza ubumwe n'ubudaheranwa.