Umuyobozi w’Akarere Wungirije Ushinzwe Iterambere ry’Ubukungu Madamu UWANYIRIGIRA Clarisse yihanganishije umuryango mugari wa Ibuka mu karere ka Musanze n'abarokokeye mu cyahoze ari Komini ya Kinigi, asaba urubyiruko kwigira ku Ngabo zahagaritse Jenoside Yakorewe Abatutsi mu 1994, umuco w'ubutwari, guharanira icyiza no kubaka ubumwe bw'abanyarwanda.

Byagarutsweho n’Umuyobozi w’Akarere Wungirije Ushinzwe Iterambere ry’Ubukungu Madamu Uwanyirigira Clarisse, mu mugoroba wo kwibuka ku nshuro ya 31, Abatutsi biciwe mu cyahoze ari Komini Kinigi wabereye ku biro by’umurenge wa Kinigi. Yagize ati: "Ndagira ngo nihanganishe umuryango wa Ibuka turi kumwe hano n’imiryango y’Abacitse ku icumu rya Jenoside Yakorewe Abatutsi mu 1994 iri hano, by’umwihariko abarokokeye hano ahahoze muri Komini ya Kingi.”

Umugoroba wo Kwibuka ni igihe cyo kuzirikana Abatutsi bambuwe ubuzima, gufata mu mugongo Abarokotse Jenoside yakorewe Abatutsi no gufata ingamba z’uko Jenoside itazongera kubaho. Madamu Uwanyirigira Clarisse ati: “Mu gihe tuzirikana abatutsi bambuwe ubuzima bazira uko bavutse, bakabwamburwa n’ababayoboraga n’abaturage, twese turahari kugira ngo dukomeze tubafate mu mugongo, ariko no kugira ngo dufate ingamba zo kugira ngo Jenoside itazongera ukundi”.

Yakomeje avuga ko urubyiruko rufite umukoro wo kwigira ku Ngabo zari iza RPF zahagaritse Jenoside, umuco w’ubutwari no gukomeza guharanira icyiza, kandi indangagaciro zattozwaga abanyarwanda zikatubera umurunga wo guharanira ko  ko ibyabaye bitazongera kubaho, wo gusigasira ibyiza twagezeho no gutegura ahazaza. Yagize ati: "Ni byiza ko tuzirikana ubutwari bw’ingabo zari iza RPF zabohoye U Rwanda, zigahagarika Jenoside. Ni umukoro ukomeye ku banyarwanda ariko by’umwihariko urubyiruko, kuko abahagaritse Jenoside bari urubyiruko. Rero navuga ko ari umukoro ukomeye kugira ngo urubyiruko ruriho uyu munsi ndetse n’ejo hazaza rufatireho uwo muco mwiza w’ubutwari, wo gukomeza guharanira icyiza no gukomeza kubaka ubumwe”. 

"Abanyarwanda batozwaga umuco w’ubutwari, ubupfura gukunda igihugu ndetse no kuba umwe. Izi ndangagaciro zikomeze kutubera umurunga, wo guharanira ko Jenoside itazongera kubaho ukundi. Dukomeze gusigasira ubumwe, amahoro ndetse n’ubuyobozi bwiza dufite. Dutegure ejo hazaza h’urubyiruko ndetse n’abana bacu twubaka u Rwanda rudaheza, rugendera ku bumwe bwa twese”.

Visi Meya Uwanyirigira Clarisse, yasabye abaturage gusigasira amateka no gukomeza kuba abarinzi b’ibyagezweho, baharanira ko Jenoside itazongera kubaho ukundi. Yagize ati: “Baturage ba Kinigi ndetse n’abandi turi hano, reka dukomeze guharanira kugira ngo dusigasire amateka yacu ndetse tuyigishe abakiri batoya ariko tunakomeza kurwanya abagoreka amateka yacu bayavuga uko bishakiye. Reka rero dukomeze kubaka ndetse no gukomeza kugira icyizere cy’ejo hazaza kandi nsaba ko buri wese uri hano dukomeza kuba abarinzi b’ibyagezweho no guharanira ko Jenoside itazongera kubaho ukundi”.