Kuri uyu munsi tariki 4 Mutarama 2024, Umuyobozi w' Akarere Bwana Claudien NSENGIMANA yayoboye Umwiherero wahuje Komite Nyobozi y' Akarere, Abayobozi b' Amashami  akorera mu Karere n' Abanyamabanga Nshingwabikorwa b' Imirenge yose igize Akarere.

Uyu mwiherero wabereye mu Karere ka Musanze ukaba wanitabiriwe na Minisitiri w' Ubutegetsi bw' Igihugu Bwana Jean Claude  MUSABYIMANA, Guverineri w' Intara y' Amajyarugu Bwana  Maurice  MUGABOWAGAHUNDE n' Abagize Inama  y' Umutekano Itaguye y' Akarere ka Musanze.

Minisitiri w' Ubutegetsi bw' Igihugu Jean Claude MUSABYIMANA

Intego nyamukuru y' uyu mwiherero yari ; gusuzumira hamwe imikorere n' imikoranire hagati y' inzego z' Ubuyobozi bw' Akarere no gufata ingamba zihamye zo kurushaho kuyinoza, kureba urwego Akarere kagezeho mu kwesa Imihigo ya 2023-2024 no gushimangira uruhare rwa buri wese  mu kuyishyira mu bikorwa, kujya inama ku cyakorwa kugirango Akarere kagere ku iterambere rirambye kandi buri rwego rukabigira ibyarwo.

Nyuma yo kugezwaho n' Ubuyobozi bw' Akarere imyanzuro  yafatiwe muri uyu mwiherero n' uburyo izashyirwa mu bikorwa, Minisitiri w' Ubutegetsi bw' Igihugu  yashimye Akarere ingamba nshya gatangiranye umwaka bityo asaba buri wese kugira umuhate wo kuzuza inshingano zimureba kandi ku gihe, gukorera ku ntego no gusenyera umugozi umwe kugirango Akarere kabashe kwesa Imihigo ku rwego rushimishije. Minisitiri yanasabye Ubuyobozi bw' Akarere gushyira imbaraga mu gukemura ibibazo by' abaturage ,kwimakaza umuco w' isuku n' isukura anatanga izindi nama zitandukanye.

Umuyobozi  w' Akarere Bwana Claudien NSENGIMANA ashimangira ingamba zo kunoza imikorere

Asoza ijambo rye, Minisitiri yijeje Ubuyobozi bw' Akarere ka Musanze ubufasha bwose buzakenera kuri Minisiteri y' Ubutegetsi bw' Igihugu kugirango Akarere gakomeze gutera imbere.

Minisitiri atanga impanuro ku byakwibandwaho  mu guharanira iterambere ry' Akarere