Kuri uyu wa 16/09/2022, Umuyobozi w'Akarere Bwana RAMULI Janvier yashimiye cyane abakinnyi b'Amakipe y'abafite ubumuga kubera guhesha ishema Akarere ka Musanze kubwo kwegukana ibikombe icyenda (9) mu marushanwa y'abafite ubumuga atandukanye bitabiriye mu mwaka wa 2021/2022. Babimushyikirije ku mugaragaro kuwa 5 muri Stade Ubworoherane.

Umwaka w’imikino wa 2021-2022 waranzwe n’intsinzi ku ikipe ya Musanze y’abantu bafite ubumuga (Musanze Paralympic Team). Amakipe yabashije kwitwara neza akegukana ibikombe ni aya akurikira:  

Boccia: umukino ukinwa n’abana bafite ubumuga bwo mu mutwe;
Athletics: Umukino ukinwa n’ibyiciro byose by’abantu bafite ubumuga;
Wheelchair basket ball: Umukino wa basket ukinwa hifashishijwe amagare y’abantu bafite ubumuga;
Sit ball y’abakobwa: ni umukino ukinwa n’abafite ubumuga bw’ingingo;
Amputee foot ball y’abahungu: uyu mukino ukinwa n’abacitse ukuguru kumwe;
Amputee foot ball y’abakobwa: ni umukino’abacitse ukuguru kumwe (abakobwa)
Igikombe cy’indashyikirwa: iki ni igikombe cy’ahawe ikipe ya Musanze Paralympica Team kubera ko yatwaye imidari myinshi mu mukino wa Athletics. 

Mu butumwa bwe, Umuyobozi w'Akarere yashimiye cyane abafite ubumuga kuba barahesheje ishema Akarere ka Musanze bitwara neza mu marushanwa atandukanye y'abantu bafite ubumuga ku rwego rw'Igihugu. Yabashimiye intsinzi begukanye zatumye bahabwa ibikombe icyenda (09). Yabasabye gukomeza kwigirira icyizere no kwitabira gahunda zose za Leta zibateza imbere muri rusange kimwe n'abandi banyarwanda ndetse n'amahirwe y'umwihariko bashyiriweho nk'abantu bafite ubumuga. Yagize ati: izi ni imbuto z'Imiyoborere Myiza Igihugu cyacu cyagejejweho na Nyakubahwa Perezida wa Repubulika Paul KAGAME. Yasoje abizeza ubufatanye buhoraho mu bikorwa byabo byose, anabasezeranya kuzajya aza ku kibuga kwitabira imikino no kubafana. Ku bijyanye n'amikoro amakipe akenera yabijeje inkunga y'Akarere n'ubuvugizi aho bizaba ari ngombwa. Ku bijyanye n'ibibuga by'imikino bijyanye n'igihe,  yabijeje ko mu minsi iri imbere Akarere kazakorana n'abafatanyabikorwa batandukanye kugira ngo bizaboneke.

Abafite ubumuga mu Karere ka Musanze bishimiye uyu munsi banashimira ubuyobozi bw'Akarere ka Musanze ukuntu budahwema kubaba hafi no kubatera inkunga mu bikorwa bitandukanye bibateza imbere.

KAMANZI Jean Bosco

Ag PRMCO