Muri ya gahunda y’imikorere n’imikoranire isanzwe irangwa hagati y’Inzego Bwite za Leta n’Abafatanyabikorwa bazo, barimo n’Amadini n’Amatorero, ndetse na wa muco wo kwifatanya n’abaturage muri gahunda zitandukanye muri rusange uranga Imiyoborere Myiza mu Gihugu cyacu, mu gitondo cyo kuri uyu wa Kane tariki ya 13 Gicurasi 2021, Umuyobozi w’Akarere ka Musanze, Madamu NUWUMUREMYI Jeannine, yifatanije  n’Abayoboke b'Idini ya Isilamu bo mu Karere ka Musanze mu Isengesho ry'Umunsi Mukuru wa Eid Al Fitir.

Iri sengesho ryakorewe ku Kibuga cya GS Muhoza II, ahari hahuriye  Abayisiramu basengera  ku Musigiti Mukuru wa Musanze (Masjid Nuur) n'abasengera ku Musigiti wa Mubona,  ryayobowe na Sheikh NSHIMIYIMANA Saleh, Wungirije Mufti w'u Rwanda, wari kumwe  na Imam w'Intara Sheikh Ismael Seif n'abandi Bayobozi b'Idini batandukanye, bashimye uburyo Ubuyobozi bw'Igiohugu budahwema kubaba hafi.

Umunyamabanga Nshingwabikorwa w’Umurenge wa Muhoza iyi Misigiti yombi iherereyemo ari nawo wabereyemo uyu muhango, Bwana MANZI Jean Pierre n’Umunyamabanga Nshingwabikorwa w’Akagari ka Mpenge. Madamu MUKESHIMANA Odette, isengesho ryayobowe na Vice  Mufti w'u Rwanda Sheikh NSHIMIYIMANA Saleh hari Imam w'intara Sheikh Ismael Seif n'abandi bayobozi b'idini batandukanye, abashyitsi bashimiwe cyane kuba baje kwifatanya n'abayislamu mu munsi mukuru wabo. 

Mu butumwa yabahaye, Umushyitsi Mukuru yabashimiye uruhare rwabo mu iterambere ry’Akarere n’iry’Igihugu muri rusange ndetse no mu kuzamura imibereho myiza y’abaturage,bityo aboneraho kubahamagarira gukomeza kurangwa n'imyitwarire myiza nk'iyo bagaragaje mu Gisibo Gitagatifu cya Ramadhan, gukomeza gufatanya n’abandi mu gushimangira iyubahirizwa  ry’amabwiriza yo kwirinda no kurinda abandi icyorezo cya COVID 19. Yasoje abifuriza Irayidi nziza anabizeza ubufatanye buhoraho.

                            Abayoboke bari bitabiriye amasengesho

                              Umuyobozi w'Akarere atanga impanuro

Umunyamabanga Nshingwabikorwa w'Akagari (uhereye ibumoso) n'Umunyamabanga Nshingwabikorwa w'Umurenge (uhereye iburyo) bafata ifoto n'Abayobozi b'Idini (abo hagati)

 Muri uyu muhango kandi, abifuza kuzakora Umutambagiro Mutagatifu (Hijja) basabwe ko baba bamaze kwiyandikisha bitarenze uku kwezi kwa Gicurasi 2021.