Umunsi wa mbere w’imikino ya nyuma y’Amarushanwa Umurenge Kagame Cup 2025 urangiye amakipe yo mu Karere ka Musanze yitwaye neza kuko yose uko ari atatu yegukanye intsinzi.

Amarushanwa “Umurenge Kagame Cup” ari kubera mu karere ka Musanze, kuva kuwa 14-15 Kamena 2025, akaba agamije kwimakaza imiyoborere myiza. Ni amarushghanwa akinwa guhera ku rwego rw’umurenge mu mikino itandukanye irimo  irimo Umupira w’Amaguru,Volleyball, Basketball, Kubuguza, Gusiganwa ku maguru, Gusimbuka Urukiramende na Sitball.

Kuri uyu munsi, akarere ka Musanze kaserukiwe n’amakipe atatu, abiri mu cyiciro cy’abahungu n’imwe y’abakobwa.  Mu cyiciro cy’abahungu mu mukino wa Football, Musanze yegukanye umwanya wa gatatu nyuma yo gutsinda Karongi igitego 1-0. 

Mu mukino wa Baskettball, amakipe yombi yabonye itike iyageza ku mukino wa nyuma uzakinirwa kuri Stade ubworoherane, kuri uyu wa 15 Kamena 2025. Ikipe y’Abahungu yatsinze Kayonza 75-56, naho iy’abakobwa itsinda Nyamagabe 46-34.

Muri Volleyball, Ikipe y’abagabo ya Kayonza yegukanye umwanya wa gatatu nyuma yo gutsinda Rusizi amaseti 3-0. Mu bagore umwanya wa gagatu wegukanywe na Nyanza nyuma yo gutsinda Rutsiro amaseti 3-0.

Mu mikino yo guhatanira umwanya wa gatatu muri Basketball mu bagabo, Kayonza yatsinze Kicukiro amanota 70-64.

Mu mupira w’amaguru, Ikipe ya Murunda yo mu Karere ka Rutsiro yatsinze iya Gahara yo mu Kirehe ibitego 2-1 yegukana umwanya wa gatatu mu bagore. Umwanya wa nyuma uzahuza Jabana yo mu karere ka Gasabo na Mbazi yo mu karere ka Huye. Mu bagabo, Umukino wa nyuma uzahuza ikipe ya Kacyiru yo muri Gasabo na Mahembe yo mu karere ka Nyamasheke.

Mu mikino ya ½ muri Basketball mu Bagabo, Rutsiro yatsinze Kicukiro amanota 57-54. Umukino wa nyuma uzahuza Rutsiro na Musanze, no ho mu bagore, uhuze Musanze na Kamonyi yazamutse isezereye Kayonza ku manota 63-37. Umukino wa nyuma uzahuza Musanze na Kamonyi.

Muri Volleyball y’abagabo, Ngoma yatsinze Rutsiro amaseti 3-0. Mu bagore, Gicumbi yihererana Kayonza ku maseti 3-0, na Ngoma ibigenza ityo kuri Rusizi. Umukino wa nyuma  wa Volleyball uzahuza Gicumbi na Ngoma.