Mu mikino itandukanye y’irushanwa Umurenge Kagame Cup 2025 ku rwego rw’Intara y’Amajyaruguru, ibikombe bitandatu byose byatashye mu karere ka Musanze, Akarere kabereye ubukerarugendo n’ishoramari.

Kuwa 28 Werurwe 2025, Mu mikino y’Umupira w'Amaguru yabereye mu Karere ka Rulindo, kuri Sitade Ikirenga, Akarere ka Musanze kihariye intsinzi, bityo gatahana ibikombe byose byatanzwe uwo munsi. Mu bagore, ikipe ya Musanze yanganije 1- 1 n'iya Burera, Musanze itsindira kuri penaliti 5 kuri 3 z’ikipe yaserukiye Akarere ka Burera. Mu bagabo, Musanze yanganije na Rulindo ibitego 3, umukino urangira Musanze itsinze Rulindo Penality ari 4-2.

Indi mikino Akarere kagaragarijemo ko ari intarushwa yabaye kuwa 30 Werurwe 2025, ibera ku bibuga bitandukanye byo mu karere ka Gicumbi. Kuri uyu munsi, Akarere ka Musanze katahanye ibikombe bitatu. Mu mukino wa Basketball, Abahungu n’Abakobwa ba Musanze batahanye ibikombe nyuma yo gutsinda amakipe y’Akarere ka Gicumbi. Uyu munsi kandi no mu mukino wa Sittball twatahanye intsinzi, bityo ibikombe bitatu bitaha i Musanze.

Kuwa 31 Weruwe 2025, ku kibuga cyo mu Kigo cy’Urubyiruko cy'Akarere ka Musanze, Ikipe y’Akarere ka Musanze y’Abahungu yihereranye ikipe ya Gakenke iyitsinda amaseti 3 - 0 mu mukino wa Volley Ball, ishimangira ko Akarere ka Musanze ari iwabo w’Impano mu Mikino itandukanye.

Muri iyi mikino yose, Umuyobozi w’Intara y’Amajyaruguru Nyakubahwa Mugabowagahunde Maurice yatanze ubutumwa bwibanze ku gushimira amakipe yitabiriye amarushanwa, gushishikariza ayabonye itike yo kuzahagararira Intara y’Amajyaruguru ku rwego rw’Igihugu kwitegura neza no kwibutsa abantu kuzagira uruhare mu bikorwa byose byo Kwibuka ku nshuro ya 31 Jenoside yakorewe Abatutsi mu 1994, bitangizwa n’icyumweru cy’icyunamo kwibuka bigakomeza mu gihe cy’iminsi ijana (100).