Kuri uyu wa 4 tariki ya 10/11/2022, Umunyamabanga Uhoraho muri Minisiteri y'Ibikorwaremezo MININFRA Bwana ABIMANA Fidèle ari kumwe n'Umuyobozi wa Enabel - Rwanda Bwana Dirk Deprez n'abandi bagize "Steering Committee" ku rwego rw'Igihugu ishinzwe gukurikirana ishyirwa mu bikorwa ry'Imishinga iteza imbere Ubukungu mu Mijyi "Urban Economics Development Projects initiative (UEDEi) ku bufatanye na Enabel [ LODA, RHA, RDB,...) basuye Imishinga itatu y'Akarere ka Musanze ishyirwa mu bikorwa ku bufatanye na Enabel - Rwanda. Bakiriwe n'Umuyobozi w'Akarere Wungirije Ushinzwe Iterambere ry'Ubukungu Bwana MPUHWE RUCYAHANA Andrew ari kumwe n'Umunyamabanga Nshingwabikorwa w'Akarere Bwana KANAYOGE Alex.

Imishinga itatu Akarere gafatanyamo na Enabel - Rwanda basuye uyu munsi ni iyi ikurikira:  Agakiriro gashya ka Musanze kubatswe mu Murenge wa Cyuve katangiye gukorerwamo, Umushinga wo Kwagura Ikigo cy'urubyiruko cya Musanze aho imirimo y'ubwubatsi yatangiye ikaba igikomeje, n'Isoko ry'ibiribwa rya Musanze rizwi nka "Carrière" rigiye kubakwa bundi bushya mu buryo bugezweho (Igorofa) aho imyiteguro ijyanye n'Umushinga wo Kubaka iri soko rishya ry'ibiribwa rya Musanze igeze kure. Ni muri urwo rwego banasuye ahateganyijwe kwimurirwa abasanzwe bacururiza mu Isoko ry'ibiribwa rya Musanze (inyubako ziherereye muri Gare ya Musanze) mu gihe imirimo yo kubaka Isoko rishya ry'ibiribwa rya Musanze izaba igiye gutangira mu minsi mike iri imbere. Hashimwe imyiteguro n'ibimaze gukorwa 

Abakorera mu Gakiriro gashya k'Akarere ka Musanze bagaragaje ko imikorere imaze gutera imbere kandi ko abakiliya babagana bishimira Serivisi babaha. Batanze icyifuzo cy'uko bazasabirwa mu Kigo gishinzwe ingufu mu Rwanda "Rwanda Energy Group (REG)" bagashyirwa mu cyiciro kibafasha kugura umuriro w'amashanyarazi ku giciro gito, Umunyamabanga Uhoraho muri Minisiteri y'Ibikorwaremezo yabasezeranyije kuzabakorera ubuvugizi ku bufatanye n'Ubuyobozi bw'Akarere ka Musanze.

Muri rusange abagize "Steering Committee ku Mishinga UDEi iterwa inkunga na Enabel - Rwanda bashimiye Akarere ka Musanze  ibyakozwe hatangwa n'inama zo kwihutisha ibisigaye bitaragera ku rugero rwifuzwa. Imishinga yose yasuwe yitezweho kugira uruhare mu iterambere ry'Umujyi wa Musanze mu rwego rw'iterambere ry'Ubukungu n'iry'imibereho myiza y'abawutuye. Imihigo irakomeje kandi irashoboka.

Kamanzi Jean Bosco

Ag PRMCO