Kuri uyu wa Kabiri tariki ya 15/10/2024 mu Mirenge yose igize Akarere ka Musanze hijihijwe Umunsi  Mpuzamahanga w'Umugore wo mu Cyaro  ufite insanganyamatsiko igira iti: “IBIDUKIKIJE - UBUZIMA BWACU ". Ku rwego rw'Akarere ibirori byabereye mu Murenge wa Remera, Akagari ka Rurambo, Umudugudu wa Bitsibo. Umushyitsi Mukuru muri uyu muhango yari Umuyobozi w' Akarere ka Musanze Bwana, NSENGIMANA Claudien wakiriwe n' Umunyamabanga Nshingwabikorwa w' Umurenge wa Remera, Bwana Twizerimana Clement. Ibi birori kandi byitabiriwe  n'Inzego z'Umutekano, Umuhuzabikorwa wa CNF wungirije ku rwego rw' Akarere Madamu Mukandayisaba Marie Grace , Komiseri Ushinzwe Ubukungu muri CNF ku rwego rw' Intara y' Amajyaruguru , Madamu NIYOYITA Irene Marie, Umukozi w' Akarere ushinzwe Uburinganire n' Iterambere ry' Umuryango Madame Gasoromanteja Sylvanie, Abagize CNF ku rwego rw' Umurenge , Utugari n' Imidugudu y' Umurenge wa Remera. Mu rwego rwo kwifatanya n'Abaturage Umuyobozi w' Akarere Wungirije Ushinzwe Iterambere ry’ubukungu Madame UWANYIRIGIRA Clarisse, yifatanyije n' Abaturage b' Umurenge wa Muko . Umuyobozi w' Akarere Wungirije ushinzwe Imibereho Myiza y’Abaturage Bwana KAYIRANGA Theobald yifatanyije n' Abaturage b' Umurenge wa Gataraga. Mu butumwa batanze Bose bagarutse mu gushimira abitabiriye uyu munsi banashimira kandi Umugore wo mu Cyaro ku ruhari bakomeza kugaragaza mu iterambere ry’Igihugu cyacu.

Mu ijambo ry' Umushyitsi Mukuru Bwana NSENGIMANA Claudien, yagarutse ku gushimira Ubuyobozi bw'Igihugu cyacu bwasubije umugore ijambo ndetse ashima intambwe imaze guterwa mu kwimakaza ihame ry'Uburinganire n'Ubwuzuzanye. Yagarutse ku nzitizi zituma iterambere ry'umugore n'Umuryango muri rusange ritagerwaho, akangurira abitabiriye ibirori ibi  bikurikira: Kubungabunga ibidukikije kuko aribwo buzima bwacu, Kwibumbira mu matsinda n'amashyirahamwe bimufasha kwizigama, Gusezerana mu buryo bwemewe n'amategeko ku batarasezerana, Gukumira no kurwanya inda ziterwa abangavu no gukurikirana mu butabera ababateye inda, Kwitabira kugana ibigo by'imari ( SACCOs ) , Kwirinda ingeso mbi zo kwishora mu biyobyabwenge n'uburaya, Gufata ingamba zo kurwanya imirire mibi , kubyara abana bashoboye kurera, Gufatanya mu gukumira  amakimbirane yo mu miryango, Gukora cyane bitabira umurimo, Guharanira kugira isuku, Kwita ku burere n'uburezi  bw'abana no kubera abana urugero rwiza, Gufatanya mu gukemura ibibazo bibangamiye imibereho myiza y'abaturage. Yasabye abitabiriye kujya muri Ejo Heza, gutanga ubwisungane mu Kwivuza no gukomeza kwirinda indwara z’Ibyorezo bakaraba Amazi meza. Abafatanyabikorwa basabwe gukomeza kugira uruhare mu bikorwa biteza imbere abagore, Abagabo basabwa kugira uruhare mu gufayanya n'abagore mu guteza imbere imiryango yabo. Mu gusoza yashimiye abagize uruhare mu gutegura uyu munsi ashimira abafatanyabikorwa n'abaturage uburyo bitabiriye. Mu bikorwa byabaye , hatanzwe Inka (Kwitura ), gutanga Ibiseke ( Imbuto zo guhinga ), Gutanga Imbabura ( Hagamijwe kubungabunga Ibidukikije no kwirinda Umwanda ) n’Ibindi.