Kuri uyu wa kabiri, kuri Sitade UBWOROHERANE habereye  umukino wahuje  ikipe y' Abayobozi n' abakozi b' Akarere ka Musanze  n' ikipe ya POLICE ikorera   mu Karere  wateguwe mu rwego rwo gutegura gutangiza ukwezi kwahariwe ibikorwa by' inzego z' umutekano.Uyu mukino witabiriwe n' Umunyamabanga Nshingwabikorwa w' Intara y' Amajyaruguru Bwana Emmanuel NZABONIMPA , Komite Nyobozi y' Akarere ka Musanze, inzego z' umutekano ( Ingabo na POLICE) , abakozi b' Akarere mu nzego zinyuranye n' abafana baturutse impande n' impande.

Bimwe mu bikorwa biteganyijwe mu kwezi kwahariwe ibikorwa by' inzego z' umutekano harimo; gukora ubukangurambaga bunyuranye  binyuze muri Siporo buzibanda   ku gushishikariza  abaturage kwimakaza isuku n' isukura, gukumira no kurwanya ibyaha, kurwanya igwingira ry'abana n'ibindi. Umukino warangiye POLICE itsinze Akarere ka Musanze ibitego bitanu kuri bibiri( 5-2). Nyuma y' Umukino, Umuyobozi wa POLICE mu Karere SP James Bagabo yasobanuriye abitabiriye umukino uko gahunda y' ukwezi kwahariwe ibikorwa by' inzego z' umutekano iteye n' intego yabyo ko bigamije guteza imbere imibereho myiza y' abaturage babigizemo uruhare.

 Umuyobozi  w' Akarere Ka Musanze   Bwana Claudien NSENGIMANA yashishikarije abaturage kuzitabira amarushanwa azaba muri uku kwezi azibanda ku kwimakaza isuku kurusha abandi haba mu nzego z' Ubuyobozi no ku baturage ku giti cyabo. Yanabasabye gukomeza gusigasira ibyiza twagezeho tubikesha imiyoborere myiza  ishingiye ku budasa bw' imikoranire hagati y'  inzego z' ubuyobozi, inzego z' umutekano n' abaturage.