Kuri uyu wa kabiri tariki ya 14 Mata 2026, ku Rwibutso rw’Akarere rwa Cour d’Appel de Ruhengeri, habereye Umugoroba wo Kwibuka ku nshuro ya 32 Jenoside yakorewe Abatutsi mu 1994 mu Rwanda hazirikanwa by’umwihariko Abatutsi biciwe mu cyahoze ari Urukiko rw’Ubujurire rwa Ruhengeri.

Iki gikorwa cyabimburiwe n’urugendo rwo kwibuka rwatangiriye ku isoko rya GOICO, aho abayobozi barangajwe imbere na Guverineri w’Intara y’Amajyaruguru, Bwana Mugabowagahunde Maurice, bifatanyije n’abaturage mu kwibuka no guha icyubahiro abazize Jenoside yakorewe Abatutsi.

Bageze ku rwibutso, Abayobozi n'abaturage bunamiye Abatutsi bazize Jenoside mu rwego rwo kububaha no guharanira ko Jenoside itazongera kubaho ukundi.

Ubutumwa bwatanzwe n’abayobozi batandukanye bwagarutse ku gushimangira icyizere cy’ubuzima, kwibuka nk’inshingano ya buri Munyarwanda ndetse n’amahitamo akwiye yo kubaka igihugu kirangwa n’amahoro n’ubumwe. Banibukije ko Kwibuka ari inzira yo gukumira ko amateka mabi yazongera kwisubiramo, no gukomeza kwimakaza ubumwe n’ubudaheranwa bw’Abanyarwanda.