Nkuko bisanzwe, buri kuwa 6 wa nyuma w'ukwezi ni munsi wahariwe ibikorwa by'umuganda rusange. Kuri uyu wa 6 tariki ya 29/10/2022, umuganda usoza ukwezi k'Ukwakira 2022 wakozwe mu Mirenge yose igize Akarere ka Musanze.

Ibikorwa by'umuganda byibanze ku bikorwa byo kurwanya Isuri (gutera ibiti, gucukura imirwanyasuri, gucukura ibyobo bifata amazi,...), gukumira no kurwanya Ibiza (gusana ibiraro ku migezi, gusibura imiferege itwara amazi,...), gukemura HSI (kubakira cg gusanira imiryango itishoboye amacumbi,...).

Ku rwego rw'Akarere, umuganda w'uyu munsi wakorewe mu Murenge wa Kimonyi. Witabiriwe n'Umuyobozi w'Akarere Bwana RAMULI Janvier, Umuyobozi w'Akarere Wungirije Ushinzwe Imibereho Myiza y'Abaturage Mme Axelle KAMANZI, Uhagarariye Ingabo Major D . MUSONI, Uhagarariye Polisi y'Igihugu DPC SP Elvis MUNYANEZA, abakozi ku Karere, ES w'Umurenge wa Kimonyi n'abakozi bakorera ku Murenge no mu Tugari, abanyeshuri ba UR - CAVM n'abaturage mu ngeri zitandukanye.

By'umwihariko, umuganda w'uyu munsi wanitabiriwe n'abahagarariye Amashami y'Umuryango w'Abibumbye "UN" akorera mu Rwanda. Hitabiriye Umuyobozi wa WFP mu Rwanda Mme Edith HEINES n'Umukozi wari uhagarariye UNDP - Rwanda Bwana Jean Baptiste RUBAZINDA. Bafatanyije n'Abayobozi b'Akarere n'abaturage gutera ibiti by'imbuto ziribwa bya avoka bigera ku 2000. Byari kandi mu rwego rwo Kwizihiza imyaka 60 u Rwanda rumaze ari umunyamuryango w'Umuryango w'Abibumbye "UN".

Mbere yo yuko abaturage batera ibiti by'imbuto ziribwa bya avoka, babanje gusobanurirwa n'umwarimu muri UR - CAVM akamaro ko kubanza kwitegereza urugemwe rubanguriye rugiye guterwa. By'umwihariko beretswe ibishobora kubangamira imikurire y'urugemwe rugiye guterwa harimo cyane cyane "ibisambo" bishobora kuba byaraje ku rugemwe.

Umuyobozi wa WFP - Rwanda Edith HEINES yashimye ubufatanye bwaranze u Rwanda n'Umuryango w'Abibumbye mu myaka 60 ishize. Yavuzeko ubu bufatanye buzakomeza mu myaka izaza mu bikorwa by'iterambere ry'ubukungu n'iry'imibereho myiza. Hashimwe umuganda nk'igikorwa cy'ubudasa bw'u Rwanda bwo kwishakamo ibisubizo kandi bikaba ari n'urugero rwiza ku bindi Bihugu. 

Nyuma y'igikorwa cy'umuganda wakozwe haterwa ibiti by'imbuto, Umuyobozi w'Akarere yageje ubutumwa ku bitabiriye umuganda. Abaturage bakanguriwe gukomeza kwita k'ukubungabunga ibidukikije batera ibiti byinshi birimo iby'imbuto ziribwa n'indumburabutaka, gukumira no kurwanya Ibiza, kugira umuco w'Isuku, kubagara imyaka, kugira umuco wo kuzigama, etc Yanibukije ko uyu munsi hatangijwe Igihembwe 2023A cyo gutera ibiti bijyana no kwizihiza imyaka 47 ishize hizihizwa umunsi w'igiti. 

Yasoje ashimira abitabiriye umuganda bose abasaba gukomeza gukunda umurimo, gusigasira umutekano no gukomera ku Bumwe bw'Abanyarwanda kuko ari zo mbaraga zacu.