Nkuko bisanzwe, buri kuwa 6 wa nyuma w'ukwezi ni munsi wahariwe ibikorwa by'umuganda rusange. Kuri uyu wa 6 tariki ya 26/11/2022, umuganda usoza ukwezi k'Ugushyingo 2022 wakozwe mu Mirenge yose igize Akarere ka Musanze.

Ibikorwa by'umuganda byibanze ku bikorwa byo kurwanya isuri (gucukura imirwanyasuri, gucukura ibyobo bifata amazi,...), gukumira no kurwanya Ibiza (gusana ibiraro ku migezi, gusibura imiferege itwara amazi,...), gukemura HSI (kubakira cg gusanira imiryango itishoboye amacumbi,...), gukora isuku mu mihanda minini n'imigenderano,...

Ku rwego rw'Akarere, umuganda w'uyu munsi wakorewe mu Murenge wa Musanze. Witabiriwe n'Umuyobozi w'Akarere Bwana RAMULI Janvier, Uhagarariye Ingabo Major D . MUSONI, Umuyobozi wa INES - Ruhengeri Abbé Dr BARIBESHYA Jean Bosco, Abakozi ku Karere, ES w'Umurenge wa Musanze n'abakozi bakorera ku Murenge no mu Tugari, abanyeshuri ba INES - Ruhengeri n'abaturage mu ngeri zitandukanye. 

By'umwihariko, umuganda w'uyu munsi wanitabiriwe n' Abanyamuryango ba FPR - Inkotanyi barimo abagize Komite Nyobozi ya FPR - Inkotanyi ku rwego rw'Akarere n'Umurenge wa Musanze. Bifatanyije gukora umuganda wo kubakira amazu imiryango 2 itishoboye uwa DUSABIMANA Jeanine n'uwa NYIRABAHIRE Consolata batuye mu Mudugudu wa Runyangwe mu Kagari ka Rwambogo. Umuganda wokozwe ni uwo gutwara itaka, kuvoma, gukata urwondo, guhereza urwondo, guhoma, gukora igisenge no gusakara inzu ya DUSABIMANA Jeanine yari ifite igisenge gishaje.

Nyuma y'igikorwa cy'umuganda, abaturage bakanguriwe hatanzwe ubutumwa bujyanye no Kurwanya Ruswa, kugira Isuku no kuyigira umuco, kwirinda Ibiza, Kurwanya ihohoterwa, Kurwanya amakimbirane mu miryango,... Ku bufatanye n'Ikigonderabuzima cya Musanze hanatanzwe Serivisi zo gupima ababyifuza kandi ku buntu indwara zitandura "NCDs".  

Hashimwe abitabiriye umuganda bose basabwa gukomeza gukunda umurimo, gusigasira umutekano no gukomera ku Bumwe bw'Abanyarwanda kuko ari zo mbaraga zacu.

Kamanzi Jean Bosco

Ag PRMCO