Umuganda rusange usoza ukwezi kwa Nzeri 2025 wabereye hirya no hino mu midugudu. Ku rwego rw'Akarere, ukorerwa mu murenge wa Nkotsi, Akagari ka Bikara, uhuza abatuye imidugudu ya Kindiki, Cyinkware na Kabaya

Muri uyu muganda, hatunganijwe umuhanda wa Km2, hanasiburwa inzira z'amazi. Uyu muganda witabiriwe n'Abagize Komite Nyobozi bayobowe n’Umuyobozi w’Akarere Bwana NSENGIMANA Claudien, bari kumwe n'Inzego z'umutekano; RNP na RDF hamwe n'abahagarariye IPRC Musanze na INES Ruhengeri.

Mu butumwa yageje ku baturage, Umuyobozi w'Akarere Bwana Nsengimana Claudien yabibukije ko umuturage ushaka kwivana mu bukene agomba kwirinda ibimuganisha mu bukene byose, birimo ikoreshwa ry'ibiyobyabwenge, ubunebwe, amakimbirane mu miryango, kutajyana abana ku ishuri no kurebera abarita. 

Bwana Nsengimana yasabye abaturage gukomeza kwitabira gahunda za leta zitandukanye zigamije kuzamura imibereho n'iterambere byabo: Ejo Heza, MUSA, ... abashishikariza kubyaza amusaruro amahirwe aboneka mu murenge wa Nkotsi no gukorana n'ibigo by'imari mu rwego rwo kwiteza imbere no kuzigamira ahazaza. 

Umuyobozi wa Polisi mu Karere ka Musanze SSP James BAGABO yabwiye abitabiriye umuganda ko umutekano dufite uturuka ku bufatanye bw'abaturage n'inzego z'umutekano, abasaba gukomeza ubwo bufatanye mu guhashya ibihungabanya umutekano byose, birimo n'inzoga zitujuje ubuziranenge.