Kuwa 26 Knama 2023, Minisitiri w' Ubutegetsi bw' Igihugu Bwana   Jean Claude Musabyimana , CEO wa RDB Madamu Clare Akamanzi    , Guverineri w' Intara y' Amajyaruguru Bwana Maurice MUGABOWAGAHUNDE   n' Umuyobozi w' Agateganyo w' Akarere ka Musanze   Bwana Hamiss Bizimana  bifatanyije n' abaturage  bo mu Murenge wa Kinigi mu Muganda usoza ukwezi kwa Kanama 2023.

Uwo  Muganda wakorewe ahazabera ibirori byo  Kwita Izina ku nshuro ya 19 Abana b'Ingagi bizaba  kuri Tariki 1 Nzeri 2023; ukaba waribanze ku kuhakorera isuku. Umuganda wanitabiriwe n' Intumwa za Rubanda(  Abadepite), Ingabo zarizirangajwe imbere n' Umuyobozi w' Inkeragutabara mu Ntara y' Amajyaruguru Maj. General Eric Murokore  na POLICE yari irangajwe imbere n' Umuyobozi wa POLICE mu Ntara y' Amajyaruguru ACP Francis  Muheto , Abayobozi mu nzego zitandukanye, Urubyiruko n' abaturage.

Minisitiri w' Ubutegetsi bw' Igihugu Bwana MUSABYIMANA Jean Claude arinawe wari Umushyitsi Mukuru muri Uyu Muganda  yagejeje ku baturage ubutumwa bwibanze  ku kubashishikariza gukora cyane hagamijwe kwikura  mu bukene, kurwanya ubusinzi n' ikoreshwa ry' Ibiyobyabwenge cyane cyane mu Rubyiruko, kwimakaza ubumwe bw' Abanyarwanda no  kurwanya amakimbirane yo mu Miryango mu rwego rwo kubaka umuryango utekanye.

Nyuma yo kuganiriza abaturage  bitabiriye Umuganda no kubagezaho ubutumwa butandukanye, Abayobozi mu nzego zinyuranye basuye  Site izaberaho ibirori byo Kwita Izina ku nshuro ya 19 mu rwego rwo kureba aho imirimo yo kuyitegura igeze.