Ibi ni ibyagarutsweho cyane mu biganiro by’abaturage bari babukereye bagana Ibitaro Bikuru bya Ruhengeri n’Ibigo Nderabuzima bibishamikiyeho uko ari 16 bibarizwa mu Mirenge 15 igize aka Karere (16 kubera ko Umurenge wa Kinigi ugira ibigo bibiri), muri gahunda yo gukingira Icyorezo cya COVID-19, Icyiciro cya Mbere, yatangiye gukorwa mu Rwanda kuri uyu wa Gatanu tariki ya 05 Werurwe 2021.

Ahatangiwe iyi serivisi hose, mbere y’uko igikorwa nyirizina gitangira, abaje gukingirwa babanzaga kongera kuganirizwa kuri aya mahirwe akomeye, agiye gufasha Abaturarwanda kuva mu icuraburindi bari baratewe n’imibare y’abantu bagendaga bandura iki cyorezo n’abo gikomeje kwambura ubuzima, haba mu Rwanda ndetse no mu mahanga, aho abantu bahuye n’ibihe bya Gumamurugo, ibikorwa bitandukanye bigahagarikwa, ingendo mu Ntara n’Umujyi wa Kigali zikavaho none ubu hakaba hariho gahunda ya Gumamukare, n’ibindi.

    Ku Kigo Nderabuzima cya Nyange, Umurenge wa Nyange, Abajyanama b'Ubuzima babukereye

Ku Kigo Nderabuzima cya Gashaki mu Murenge wa Gashaki (wa kure kurusha iyindi uturutse ku Biro by'Akarere)

   Ku Kigo Nderabuzima cya Kabere ho mu Murenge wa Muko, abasaza n'abakecuru mu kiganiro

                                     Ku Kigo Nderabuzima cya Kabere, mu Murenge wa Muko

                                                         Ku Kigo Nderabuzima cya Gashaki

                                  Ku Bitaro Bikuru bya Ruhengeri, mu Murenge wa Muhoza

                                   Ku Kigo Nderabuzima cya Busogo, mu Murenge wa Busogo

Uyu ni HAKIZIMANA Marie Claire ni umwe mu baturage bakingiriwe ku Kigo Nderabuzima cya Gashaki, agaragaza imbamutima ze agira, ati: “ Iki gikorwa cyanshimishije cyane, cyaduhaye ihumure kubera ko twari twarahungabanye cyane. Ndashimira Nyakubahwa Perezida wacu n’abo bafatanije kuyobora bahora bashakisha uko umuturage yabaho neza, agatera imbere, none ubu bakaba barakoze n’ibishoboka byose kugira ngo izi nkingo zitugereho kandi noneho by’umwihariko tukaba turi no kuzihabwa ku buntu nta n’igiceri cy’atanu dutanze. Tugize Imana rero iki cyorezo kikagabanuka cyangwa kikanagenda burundu, twiteguye kurushaho gukora cyane kugira ngo tuzibe icyuho cyabayeho bityo dufashe Ubuyobozi kubakira u Rwanda butwifuriza."

               HAKIZIMANA Marie Claire (Umukozi Ukora Isuku ku Kigo Nderabuzima cya Gashaki)

Aha, abari bitabiriye  bakaba basabwe kuba ba ambasaderi mu miryango yabo, aho b atuye, bagenda, bakorera, basengera n’ahandi mu gusobanura ko kuba urukingo rwabonetse bidakuyeho amabwiriza n’ingamba zigamije gukumira ikwirakwizwa ry’iki cyago zari zisanzwe zarashyizweho n’Ubuyobozi, kandi zose uko zakabaye, haba ku batarakingirwa ndetse no kubamaze gukingirwa.

 Inkingo ni ubuzima!