"Usaba/Uwaka Ruswa yangisha abaturage Leta". Ibi ni bimwe mubyo Umuyobozi wa TRANSPARENCY INTERNATIONAL - Rwanda Mme INGABIRE M. Immaculée yabwiye abagize Inama Ngishwanama y'Akarere ka Musanze yo Kurwanya Ruswa n'Akarengane kuri uyu wa 30/11/2022 mu kiganiro yabahaye. Umuyobozi w'Akarere Bwana RAMULI Janvier akaba n'umuyobozi w'Inama ngishwanama yo kurwanya ruswa n'akarengane ku rwego rw'Akarere, yatanze ikaze anitabira ibi biganiro.

Ibi biganiro byanitabiriwe n'Abayobozi mu Bigo bya Leta n'ibyigenga bikorera mu Karere. Ni muri gahunda y'ubukangurambaga mu cyumweru cyahariwe kurwanya Ruswa gifite insanganyamatsiko igira iti: "TWIMAKAZE INDANGAGACIRO ZO KURWANYA RUSWA INKINGI Y'ITERAMBERE RIRAMBYE". Hamwe n'uwari uhagarariye Urwego rw'Umuvunyi "Ombudsman" Bwana BIZIMANA Patrick, bagaragarije abitabiriye ahakiri ibyuho bya Ruswa. Hashingiwe ku byavuye mu bushakashatsi, hatunzwe agatoki ahakigaragara ibyuho bya Ruswa:

• Itangwa ry'amasoko ya Leta,
• Itangwa ry'akazi,
• Kubara no gutanga ingurane ikwiye ku mitungo itimukanwa yangizwa mu gihe cy'imishinga ifitiye abantu benshi akamaro,
• Serivisi zijyanye no gushaka ibyangombwa by'ubutaka,
• Etc

Hashimwe Akarere ka Musanze n'abagize Inama Ngishwanama y'Akarere yo kurwanya Ruswa n'Akarengane ku bikorwa barimo gukora by'ubukangurambaga basabwa kubikomeza kuko Ruswa ari imungu y'Ubukungu n'Iterambere ry'Igihugu. Hagaragajwe ko Uwaka/usaba Ruswa iyo ariyo yose yangisha abaturage Leta hashingiwe ko uwatswe/uwasabwe Ruswa aba atishimiye serivisi ahabwa bigatuma atagira ishemo ryo kwitwa umwenegihugu. 

Hifujwe ko Ubukangurambaga buzakomeza bukagera ku bantu bose mu byiciro bitandukanye. Abitabiriye bahawe umwanya wo gutanga ibitekerezo bagaragaza ahagiye gushyirwa imbaraga mu gukumira no kurwanya Ruswa n'Akarengane. 

Kmanzi Jean Bosco

Ag PRMCO