Kuri uyu wa Kane tariki ya 10 Werurwe 2022, Inzego za Gisivile n'iz'Umutekano mu Karere ka Musanze, zabyukiye mu Murenge wa Nkotsi, mu Kagari ka Bikara, mu Mudugudu wa Kiruhura, kuri Site ya Tema, ahari hatangirijwe Igihembwe cy'Ihinga 2022B ku Rwego rw'Akarere.

Iki gikorwa cyatangijwe na Perezida w'Inama Njyanama y'Akarere ka Musanze, Bwana NDAYAMBAJE Michel, wari kumwe n’Umuyobozi w'Akarere ka Musanze Wungirije Ushinzwe Iterambere ry'Ubukungu, Bwana Andrew MPUHWE RUCYAHANA, Inzego z'Umutekano, Abafatanyabikorwa mu Buhinzi batandukanye (barimo Ushinzwe Nkunganire muri RAB ku Rwego rw'Igihugu, Bwana GATARI Egide na CEO wa RYAF ku Rwego rw'Igihugu, Bwana RWIRIRIZA Jean Marie Vianney). Hari kandi n’Umuyobozi wa RAB/Sitasiyo ya Musanze, Umuhuzabikorwa wa DRN ku Rwego rwa Diyoseze Gaturika ya Ruhengeri, uwa DRN Seed Campany, AGRI- RESEARCH, Abashinzwe Ubuhinzi ku Rwego rw'Akarere n'Imirenge igize Akarere uko ari 15, n'abaturage muri rusange.

Hatewe imbuto zitandukanye z’ibishyimbo (imbuto ya mwirasi, MBC 23 ndetse n'iyo bita ingenane), zose zatanzwe na DERN, zikaba zatewe kuri hegitari ebyiri kuri H50 zigize iyi Site y’Ubuhinzi.

Aganiriza abitabiriye, Commander wa Polisi mu Murenge wa Muhoza, wari uhagarariye Polisi y’u Rwanda, yagize, ati: "Mwakoze cyane kwitabira, murabonye ahantu hose duteye kubera twahurije hamwe imbarag, ahubwo bijye bitegurwa kenshi, bibe umuco mu buzima bwanyu bwa buri munsi. Ku rundi ruhande ariko, ibi byose byaba ari imfabusa, mu gihe mwaramuka mukomeje guhishira abakora ibyaha bidukoma mu nkokora mu rugamba rw'iterambere n'imibereho myiza y'abaturage turimo, by’umwihariko abujura, abakora inzoga z'inkorano, abacuruza n’abakoresha ibiyobyabwenge. Mujye mutanga amakuru kandi muyatangire ku gihe, kugira ngo ibyaha bishobore gukumirwa bitaraba."

Izi mpanuro zashimangiwe na Perezida w'Inama Njyanama y'Akarere, wabigarutseho cyane akaboneraho kubasaba ubufatanye muri aya magambo: "Muhaguruke  turwanye  amakimbirane yo mu ngo, umwanda, inda ziterwa abangavu, igwingira, guta ishuri kw'abana, ubuzererezi, n'ibindi byose mubona ko ari ikibazo mu kwiyubakira u Rwanda twifuza."

Yasoje ashimira aba Bafatanyabikorwa mu iterambere ry'Ubuhinzi mu Gihugu, muri rusange, no muri aka Karere, by'umwihariko, nk'uko byari byanakozwe n'Umuyobozi w'Akarere ka Musanze Wungirije Ushinzwe Iterambere ry'Ubukungu mu kiganiro bari babanje kugirana cyabimburiye igikorwa nyirizina.