Uyu munsi, tariki ya 07 Ugushyingo 2025, guhera saa 08:00 za mugitondo mu Karere ka Musanze habaye igikorwa cyo gupakira ifumbire ya DAP ku buhunikoro bwa Karwasa, ijyanwa guterwa mu Byanya Bigega by’Ibiribwa (Food Basket Sites) 12 biherereye mu Mirenge 7 muri 15 igize Akarere ka Musanze.

Umuganda wo gutera iyi fumbire, ku rwego rw’Akarere wabereye mu Murenge wa Muke kuri Site ya Karuyege ihinzweho ibigori kuri Ha 102.8, aho Umuyobozi w’Akarere Bwana NSENGIMANA Claudine ari kumwe n’Umuyobozi Mukuru Wungirije w’Ikigo cy’Igihugu gishinzwe Ubuhinzi n’Ubworozi (RAB) Dr. UWAMAHORO frolence bifatanyije n’abaturage mu gutera ifumbire ku bigori. Hari kandi abahagarariye inzego z'umutekano, RAB Station ya Musanze, Abakozi b'Umurenge wa Muko.

Umuyobozi w’Akarere Wungirije Ushinzwe Iterambere ry’Ubukungu Madamu UWANYIRIGIRA Clarisse yifatanyije n’abaturage b’Umurenge wa Rwaza, kuri Site ya Mukinga mu Murenge wa Rwaza. 

Ubutumwa bwatangiwe kuri Site ya Kureyege mu Murenge wa Muko bwibanze ku gukangurira abaturage kubahirizwa amabwiriza ya FoBaSi, bagahingira rimwe kandi ku gihe imbuto iba yateganyijwe kandi bakazirikana no guterera ku gihe imiti irwanya udusimba twonona imyaka.

Umuyobozi Mukuru Wungirije wa RAB Dr. UWAMAHORO Florence yabwiye abahinzi ko ifumbire bahawe ari iyo kunganira imbaraga zabo hagamijwe kongera umusaruro w’ubuhinzi, abakangurira kwitabira gahunda y'ubwishingizi bw'ibihingwa kuko igamije kubarinda igihombo giterwa n’ibiza cyangwa ibyorezo.

Dr. Uwamahoro yabasabye kwita ku buhinzi kugira ngo bashobore kwihaza mu biribwa, gusagurira amasoko no gukora ibindi bikorwa by'iterambere bikomoka ku buhinzi.

Kuri Site 12 zose, hatewe DAP ingana na 21,700 kgs kuri 27,800 kgs yariteganyijwe ni ukuvuga 78%,kubera umunsi waranzwe n’imvura nyinshi bigatuma umuganda udakorwa neza nk’uko byari biteganijwe.