Hagamijwe kurushaho kurebera hamwe ibyagezweho mu kwihutisha iterambere ry’Akarere no kuzamura imibereho myiza y’abaturage mu Karere, imbogamizi zgaragayemo n'icyakorwa mu guhangana nazo, Inama Njyanama y’Akarere ka Musanze yateguye umwiherero w’iminsi ibiri, wabereye mu Ntara y’Uburengerazuba, mu Karere ka Rubavu, watangiye ku itariki ya 26 Ukwakira kugeza ku ya 27 Ukwakira 2021.

Ku munsi wa mbere w'umwiherero: Bamwe mu bari bitabiriye

Uretse Abajyanama mu Nama Njyanama y’Akarere, uyu mwiherero wari wanitabiriwe n’Umunyamabanga Nshuingwabikorwa w’Akarere, Umuyobozi Ushinzwe Imirimo Rusange mu Karere, Abanyamabanga Nshingwabikorwa b’Imirenge yose, Abaperezida b’Inama Njyanama z’Imirenge ndetse n’Abayobozi b’Amashami yose mu Karere, ukaba watangijwe ku mugaragaro na Guverineri w'Intara y'Amajyaruguru, Madamu NYIRARUGERO Dancille.

Nyuma yo kwakirwa n’Umuyobozi w’Akarere, Madamu NUWUMUREMYI Jeannine, na Perezida w’Inama Njyanama y’Akarere, Eng.ABAYISENGA Emile, Guverineri yashimiye ibi byiciro ubufatanye n'umurava byabaranze, ari byo soko y'umuvuduko udasanzwe w'iterambere Akarere ka Musanze kariho uyu munsi, ugereranyije n'aho kari kari mbere y'Umwaka wa 2016 batarajyaho, no kuba by'umwihariko nta makimbirane yigeze arangwa hagati y'Abajyanama na Komite Nyobozi.

Guverineri ashimira Akarere ka Musanze ubufatanye buharangwa hagati y'Inama Njyanama na Komite Nyobozi n'Abakozi babo

Aha akaba yanaboneyeho kubasaba ko mu ngamba bari bufatire muri uwo mwiherero bazashyikiriza Manda itaha, bazirikana ku kuzamura ubwitabire bw'abaturage muri Mituweli, Ejo Heza, isuku, kurwanya ubujura n'urugomo, gukemura ibibazo by'abaturage no kunganira Imirenge n'Utugari muri rusange, kugira ngo aka Karere kabe koko aka Kabiri k'Umujyi wa Kigali, Ikigega cy'Igihugu n'Igicumbi cy'Ubukerarugendo.

Ku munsi wawo wa kabiri, abitabiriye bunguranye ibitekerezo ku nyandiko ikubiyemo ibyagezweho muri iyi Manda y'Imyaka Itanu (2016 - 2021), aho by'umwihariko, mu izina rya Komite Nyobozi, Umuyobozi w'Akarere yabashimiye cyane ashimangira uburyo ibyagezweho byose byubakiwe ku ruhare rwa buri wese, binyuze mu gusangira amakuru ku buzima bw'Akarere bwa buri munsi cyane ko buri kwezi hanajyaga hakorwa inama ya Njyanama y’Akarere na Komite Nyobozi. 

Umuyobozi w'Akarere mu ijambo rye

Ibi bikaba byaranagarutsweho na Perezida w'Inama Njyanama y'Akarere, ari na we washoje ku mugaragaro uyu mwiherero wabaye ingirakamaro ku mpande zombi, aho yanagiye ashimira by'umwihariko bamwe mu Bakozi b'Akarere imbere y'abari bitabiriye.

Mu bushishozi bwinshi bateze amatwi impanuro

Abitabiriye bahawe umwanya usesuye wo gutanga inyunganizi, kubaza ibibazo no kugaragaza ibyifuzo

Bafashe umwanya uhagije mu biganiro mu Matsinda ku ngingo zitandukanye

Nyuma y’ibi, abitabiriye, icyiciro ku kindi, bafashe Ifoto Rusange, nk'Urwibutso rw'ubu budashyikirwa bujyanye n’Icyerekezo cy’Igihugu hagamijwe Umuturage ku Isonga muri byose, banifurizanya ko ubu bufatanye bwazanakomeza na nyuma y'iyi Manda.

Abajyanama muri Njyanama y'Akarere

Ifoto n'Abanyamabanga Nshingwabikorwa b'Imirenge bafata ifoto na Perezida, Visi Perezida ba Njyanama  n'Umuyobozi w'Akarere

Abaperezida ba Njyanama z'Imirenge na Perezida, Visi Perezida ba Njyanama  n'Umuyobozi w'Akarere

Abayobozi b'Amashami na bamwe mu Bakozi ku Karere nabo bafatanye ifoto n'abo Bayobozi