Mu Karere ka Musanze, kuri Centre Pastoral Notre Dame de Fatima, uyu munsi kuwa 15/11/2022 Umunyamabanga wa Leta muri MINAGRI Bwana MUSAFIRI Ildéphonse yatangije ku mugaragaro Icyumweru cyahariwe igihingwa cy'ibirayi "Potato Week".  Cyatangiye uyu munsi kuwa 15/11/2022 kizasozwe kuwa 18/11/2022. Insanganyamatsiko y'iki cyumweru: "Guteza imbere udushya n'ikoranabuhanga mu guhagarika itakara ry'imbuto y'ibirayi". Cyitabiriwe n'inzobere mu buhinzi bw'ibirayi baturutse mu Bihugu bitandukanye: Rwanda, France, Netherlands, Kenya,..Barungurana ibitekerezo ku buhinzi bw'ibirayi.

Uretse Umunyamabanga wa Leta muri Minisiteri y'Ubuhinzi gutangiza iki Cyumweru Byanitabiriwe na Nyakubahwa Guverineri w'Intara y'Amajyaruguru Mme NYIRARUGERO Dancille, Umuyobozi wa Polisi y'Igihugu mu Ntara y'Amajyaruguru CSP Francis MUHETO, Umuyobozi w'Akarere Wungirije Ushinzwe Iterambere ry'Ubukungu Bwana MPUHWE RUCYAHANA Andrew, Uhagarariye Ingabo Lt Col Joseph GATABAZI n'abandi bagize inama y'umutekano itaguye ku rwego rw'Akarere ka Musanze. Bahawe ikaze na V/M ED w'Akarere ka Musanze Bwana MPUHWE RUCYAHANA Andrew. Atanga ikaze ku bitabiriye ibikorwa by'Icyumweru cyahariwe igihingwa cy'ibirayi "potato week" cyatangiye kuri uyu wa 15-18/11/2022, yasabye abacyitabiriye gukomeza gusigasira ubutaka buhingwa baburinda Isuri no kubukoresha neza hubahirizwa icyo bwagenewe.

Mu gutangiza icyumweru cy'igihingwa cy'ibirayi, Guverineri w'Intara y'Amajyaruguru Mme NYIRARUGERO Dancille  yashimiye Leta y'u Rwanda kuri politiki nziza y'ubuhinzi yita ku iterambere ry'abahinzi muri rusange n'iry'ab'igihingwa cy'ibirayi by'umwihariko. Yijeje abitabiriye ubufatanye buhoraho muri byose. Yifurije abitabiriye ibikorwa bw'iki cyumweru kuzagira ibiganiro nyunguranabitekerezo byiza kandi bakazagira ibihe byiza mu Ntara y'Amajyaruguru no mu Karere ka Musanze by'umwihariko. Yashimiye abafatanyabikorwa bose mu buhinzi n'abafasha mu bikorwa byo gutubura imbuto y'ibirayi.

Mu butumwa bwe atangiza icyumweru cy'igihingwa cy'ibirayi, Umunyamabanga wa Leta muri MINAGRI Ildéphonse MUSAFIRI yashimiye abateguye icyumweru cyahariwe igihingwa cy'ibirayi. Yashimiye abafatanyabikorwa mu byiciro bitandukanye harimo AMBASADE Y'UBUHORANDI, AGRITERRA, URUGAGA IMBARAGA, SPF Ikigega, ... Yashimye intambwe imaze guterwa mu bushakashatsi bufasha kuzana imbuto z'amoko menshi y'ibirayi, asaba abahinzi b'ibirayi gukomeza guhinga imbuto nziza z'indobanure zamaze kuboneka. 

Yijeje abahinzi ko Leta izakomeza gukora ibishoboka byose kugira ngo ifumbire mvaruganda izakomeze kuboneka ku giciro kitari kinini ishyiramo nkunganire. Nubwo ibihe bya COVID-19 n'intambara yo muri Ukraine byatumye habaho ihindagurika ry'ibiciro byagiye byiyongera. Ubu Leta y'u Rwanda yiyemeje gufasha abahinzi kuzabona ifumbire yunganiwe ku buryo n'Igihembwe cy'ihinga gitaha ifumbire izakomeza kuboneka ku giciro cyunganiwe na Leta.

Yasabye abari mu bikorwa by'ubuhinzi gukomeza kwita k'ugushaka ifumbire y'imborera ntihabe gukoresha ifumbire mvaruganda yonyine kuko nabyo bituma ubutaka bugunduka vuba. Yasabye abahinzi b'ibirayi gukomeza kongera umusaruro mu bwinshi no mu bwiza ukava kuri toni 33 kuri hegitari imwe zikiyongera cyane ko isoko ry'umusaruro w'ibirayi rihari. Yanavuze ko igihingwa cy'ibirayi ari kimwe mu bihingwa birwanya inzara hamwe no kubitegura mu buryo bw'amafunguro butandukanye: gutogosa, amafiriti, ibyokeje, imigati ikozwe mu birayi, salades,... 

Yasabye abatanga ubwishingizi bw'ibihingwa gukomeza kuba hafi y'abahinzi b'ibirayi hamwe no kubafasha kubona inguzanyo zo mu buhinzi aho bikenewe.

Yasoje ashimira ubuyobozi bw'Intara y'Amajyaruguru n'ubw'Akarere ka Musanze mu gukomeza gufasha abahinzi kwiteza imbere mu buryo butandukanye. Muri iki gikorwa, hanasuwe abafatanyabikorwa batandukanye mu buhinzi baje kumurika ibyo bakora.  Umunsi wa mbere waranzwe n'ibiganiro ndetse no gususurutsa abitabiriye binyuze mu mbyino n'indirimbo biranga umuco nyarwanda.

Kamanzi Jean Bosco

Ag PRMCO