Kuri uyu wa 4 tariki ya 20/10/2022, ku bufatanye n'urwego rw'Abikorera mu Karere "PSF - Musanze" na NPD Ltd isanzwe ikorera mu Karere ka Musanze mu gukora imihanda ya kaburimbo, hakozwe umuganda udasanzwe wo gutwara itaka rizifashishwa mu guhoma amazu y'imiryango itishoboye iherereye mu gace k'itaka ry'ibirunga hataba itaka ryo kwifashisha mu kubaka inzu. 

Abikorera bafite imodoka zitwara ibikoresho by'ubwubatsi zipakurura "FUSO" batanze imodoka 50 zitwara itaka. Abandi batanze amikoro afasha mu kubonera imodoka lisansi, abacukura itaka,... Akarere kafashije kubona mazutu yo gushyira mu mashini ipakira itaka (caterpillar) yatanzwe na NPD Ltd. Itaka ryapakiririwe mu Murenge wa Rwaza rijyanwa mu Murenge wa Musanze, Akagari ka Kabazungu ahari imiryango itishoboye ifite amazu akeneye guhomwa. Buri modoka yagombaga gukora amasafari abiri. 

Umuyobozi w'Akarere ka Musanze Bwana RAMULI Janvier ari kumwe n'abagize inama y'umutekano itaguye y'Akarere bakurikiranye iki gikorwa. Umuyobozi w'Akarere yashimiye cyane Abikorera bo mu Karere ka Musanze bakomeje kuba abafatanyabikorwa b'Akarere muri gahunda ziteza imbere imibereho myiza y'abaturage harimo n'iki gikorwa cyunganira Akarere mu gufasha imiryango itishoboye kubona amacumbi muri gahunda yo gukemura "Human Security Issues". 

Kubera imvura yaguye mu ma saa sita, umuhanda ukanyerera, igikorwa kizongera gusubukurwa mu cyumweru gitaha kuwa kabiri tariki ya 25/10/2022. Hatuwe amasafari 63 y'itaka mu Murenge wa Musanze Akagari ka Kabazungu. Mu bisanzwe isafari imwe y'itaka kuyigeza muri uriya Murenge ni F 70,000 cg 80,000 bitewe n'aho Umudugudu uherereye. Agaciro k'umuganda wakozwe ni F 4, 410,000 tubariye isafari 1 ku F 70,000. Hashimwe cyane PSF - Musanze na NPD Ltd yatanze imashini ipakira "caterpillar" yo gupakira muri iki gikorwa.

Kamanzi Jean Bosco

Ag PRMCO