Kuri uyu wa kabiri, tariki ya 07 Mata 2026, kimwe n’ahandi mu gihugu hose, mu Karere ka Musanze hatangijwe icyumweru cy’icyunamo ndetse n’iminsi 100 yo Kwibuka ku nshuro ya 32 Jenoside yakorewe Abatutsi mu 1994.

Ku Rwego rw’Akarere ka Musanze, iki gikorwa cyabereye ku Rwibutso rw’Akarere rwa Cour d’Appel de Ruhengeri, aho abayobozi batandukanye barangajwe imbere na Guverineri w’Intara y’Amajyaruguru, Bwana Mugabowagahunde Maurice, wari umushyitsi mukuru bifatanyije n’abaturage.

Abitabiriye iki gikorwa babanje kunamira no guha icyubahiro Abatutsi bazize Jenoside bashyinguye muri uru rwibutso, bashyira indabo ku mva iruhukiyemo inzirakarengane zazize Jenoside Yokorewe Abatutsi. Ni igikorwa cyaranzwe n’ituze, icyubahiro n’icyizere cyo gukomeza kubaka ubumwe n’ubudaheranwa by’abanyarwanda.

Mu bitabiriye iki gikorwa harimo abagize Inama Njyanama y’Akarere ka Musanze, Komite Nyobozi y’Akarere, Senateri Nyinawamwiza Laetitia, imiryango iharanira inyungu z’abarokotse Jenoside nka Ibuka na Avega Agahozo, abayobozi b’amadini n’amatorero, inzego z’umutekano, ndetse n’imiryango ifite ababo bashyinguye muri uru rwibutso.

Mu ijambo rye, Guverineri Mugabowagahunde Maurice yihanganishije abarokotse Jenoside yakorewe Abatutsi, abashimira ubutwari n’ubudaheranwa bagaragaje mu bihe bikomeye banyuzemo ndetse no mu rugamba rwo kwiyubaka no kwiteza imbere. Yashimangiye ko gukomeza kubaba hafi, kubafasha no kubarinda icyabahungabanya ari inshingano za buri Munyarwanda.

Yanibukije abaturage ko bakwiye gukomeza gushyira hamwe, bakamagana bivuye inyuma abagifite ingengabitekerezo ya Jenoside, abahakana n’abapfobya Jenoside yakorewe Abatutsi, ndetse n’abashaka gusenya ibyo Igihugu cyagezeho. Yabasabye kurushaho kwimakaza ubumwe n’ubwiyunge, no guharanira ko amateka mabi atazongera kubaho ukundi.

Icyumweru cy’Icyunamo n’iminsi 100 yo Kwibuka bikomeje kuba umwanya wihariye wo kuzirikana amateka, guha icyubahiro abazize Jenoside yakorewe Abatutsi, no gushimangira umuhate wo kubaka u Rwanda ruzira amacakubiri, rushingiye ku bumwe n’iterambere rirambye.