Mu gitondo cyo kuri uyu wa Gatandatu tariki ya 13 Gashyantare 2021, mu Midugudu y'Icyitegererezo ya Mutimawurugo (Mutimawurugo Model Villages) yose yo mu Karere ka Musanze, ni ukuvuga umwe muri buri Murenge muri 15 igize Akarere,  hakozwe umuganda wihariye wa ba Mutimawurugo, nka kimwe mu bikorwa bikubiye mu  Mihigo ya Mutimawurugo.

Ku rwego rw'Akarere, uyu muganda wabereye mu Mudugudu wa Rugeyo, mu Kagari ka Cyabagarura, mu Murenge wa Musanze, Umushyitsi Mukuru akaba yari Umuyobozi Wungirije Ushinzwe Imibereho Myiza y'Abaturage, Madamu KAMANZI Axelle, wari kumwe n’Umuhuzabikorwa w’Inama y’Igihugu y’Abagore ku Rwego rw’Akarere, Madamu NYIRAMAHIRWE Blandine n’abandi Badamu mu Nzego zitandukanye n’Urubyiruko rw’Abakorerabushake, bakiriwe  n’Umunyamabanga Nshingwabikorwa w’Umurenge wabakiriye akanabashimira kuba bari baje kubatera ingabo mu bitugu, afatanije n’Abakozi b'Umurenge, abo ku Kagari n’Abaturage b'uyu Mudugudu, bari biganjemo ba Mutimawurugo.

Muri uyu muganda, Isibo ku yindi, hakozwe ibikorwa bitandukanye by’umwihariko kubaka imirima y’igikoni ya kijyambere n’udutanda trw’amasahani Uturima tw' igikoni twa Kijyambere n’udutanda tw’amasahani, gutunda amabuye bayatinda mu binogo mu muhanda wangijwe n'imvura, gucukura ingarani, kubumba amatafari yo kubaka ubwiherero bw'abatishoboye, guhoma inzu y'umuntu utishoboye, guharura imigenderano n' ibindi.

Mu mpanuro yatanze, Umushyitsi Mukuru yagize, ati: "Mbashimiye ubufatanye bukomeje kubaranga mu gufatanya n'Ubuyobozi mu kwihutisha iterambere no kuzamura imibereho myiza y'abaturage muri rusange no kuba mwitabiriye uyu muganda by'umwihariko. Kubera iyo mpamvu, kubera ko uru ari urugamba ruhoraho, mukomeze mufatane urunana mu kwimakaza umuco w'isuku, kurwanya imirire mibi, kurwanya inda ziterwa abangavu, kwibumbira mu matsinda yo kwiteza imbere, gukumira amakimbirane yo mu miryango, kugira irerero mu Mudugudu no gushyiraho akanyu mu gukumira ikwirakwizwa ry’Icyorezo cya  Covid -19."

Mu Murenge wa Musanze, nyuma y'umuganda, Umushyitsi Mukuru ashimira anatanga impanuro