Kuri uyu wa Gatandatu tariki ya 26 Gashyantare 2022, mu Karere ka Musanze, akanyamuneza ni kose ku Bayobozi mu Nzego zitandukanye za Gisivile n'iz'Umutekano, bongeye guhurira hamwe mu Bikorwa bitandukanye by'Umuganda Rusange, inkingi ya mwamba mu gushimangira wa Muco Nyarwanda w'Ubufatanye mu Kwishakamo Ibisubizo ku Bibazo Bibugarije, buri wese abigizemo uruhare.

Ku Rwego rw'Akarere, uyu muganda wabereye mu Murenge wa Muhoza, mu Kagari ka Kigombe, mu Mudugudu wa Nyamagumba, ahatunganyijwe Umuhanda wa 1km uva kuri Kaburimbo ku Biro by'Akagari werekeza ku Musozi wa Nyamagumba, basibura imiyoboro y'amazi, bamwe batunda amabuye abandi bayatinda mu binogo ndetse hanatemwa ibyatsi ku nkengero zawo.

Muri iki gikorwa, Umushyitsi Mukuru yari  Umuyobozi w'Akarere ka Musanze, Bwana RAMULI Janvier, wari kumwe n'Ukuriye RF ku Rwego rw'Intara y'Amajyaruguru, Maj.Gen. Eric MUROKORE n'Umuyobozi w'Ingabo muri iyi Ntara,  Brig.Gen. Jean Bosco RUTIKANGA, Ingabo na Polisi mu Karere ndetse n'Umuyobozi w'Akarere ka Musanze Wungirije Ushinzwe Imibereho Myiza y'Abaturage, Madamu KAMANZI Axelle.

Nyuma y'umuganda, abitabiriye bashimiwe uruhare rwabo mu gufatanya n'Ubuyobozi bw'Igihugu mu guhangana n'iki Cyorezo, aho hashyizweho ingufu zihariye muri gahunda yo kubona inkingo no gukingira abaturage kandi ku buntu, kugira ngo ibikorwa by'iterambere bisubukurwe, harimo n'umuganda nk'uyu bahamagariwe guhaguruka bakabyaza umusaruro mu gukemura ibibazo bibangamiye bagenzi babo, nyuma y’imyaka hafi ibiri yari ishize udakorwa.

Bakomeje baganira kuri Gahunda zitandukanye za Leta zirimo gukumira ibiza bazirika ibisenge, gukomeza kurwanya COVID-19, kwimakaza umuco w'isuku, kujyana abana ku ishuri no kurwanya imirire mibi n'igwingira, kwicungira umutekano no gutanga amakuru ku cyabangamira umudendezo wa muntu muri rusange.

By'umwihariko ukaba wabaye umwanya mwiza wo gukomeza gukusanya ibitekerezo bizashyirwa mu Igenamigambi no mu Ngengo y'Imari y'Akarere by'Umwaka wa 2022/2023.