Kuri uyu wa kabiri tariki ya 13/09/2022, mu Karere ka Musanze hatangijwe UKWEZI KW'IMIYOBORERE MYIZA. Iyi gahunda yatangirijwe mu Murenge wa Muhoza muri Stade Ubworoherane ahahuriye abaturage baturutse mu Mirenge ya Cyuve, Muhoza, Gacaca, Kimonyi, Musanze na Muko. Ku rwego rw'Intara byatangirijwe mu Karere kacu ka Musanze na Nyakubahwa Guverineri w'Intara y'Amajyaruguru Mme NYIRARUGERO Dancille.

Iyi gahunda yo gutangiza ukwezi kw'Imiyoborere Myiza mu Karere ka Musanze yanitabiriwe n'abayobozi mu nzego zitandukanye harimo urweho rwa Polisi y'Igihugu, urweho rw'ubugenzacyaha RIB, urwego rw'abajyanama mu by'amategeko MAJ, abahagarariye ibigo bitanga umuriro w'amashanyarazi n'amazi REG & WASAC, Abanyamabanga Nshingwabikorwa b'Imirenge, Abagize Inama Njyanama z'Imirenge n'abandi. Hanitabiriye abaturage mu ngeri zitandukanye.

Nyuma yo guhabwa ikaze n'Umuyobozi w'Akarere Bwana RAMULI Janvier, mu butumwa bwe, Nyakubahwa Guverineri yashimiye abitabiriye abibutsa ko iyi gahunda igamije kwegera abaturage, kuganira nabo, kubatega amatwi no kubakemurira ibibazo. Yagize ati: izi ni imbuto z'Imiyoborere Myiza dutozwa na Nyakubahwa Perezida wa Repubulika Paul KAGAME. Abitabiriye iyi gahunda babyishimiye cyane.

Nyuma abaturage bahawe umwanya wo kubaza ibibazo bitandukanye bihabwa ibisubizo n'umurongo w'uko byakemurwa. Ibibazo byabajijwe byiganje ni ibi bikurikira:

▶️ Ibibazo bishingiye ku ngurane z'imitungo yangijwe mu ikorwa ry'ibikorwaremezo by'amashanyarazi cyangwa iby'amazi
▶️ Ibibazo bishingiye ku manza z'imitungo zarangijwe abatsinzwe ntibanyurwe n'uko byakozwe.
▶️ Ibibazo byerekeye amakimbirane ashingiye ku mitungo.
▶️ Ibibazo bijyanye no gusaba ubufasha butandukanye.

Iyi gahunda yasojwe Guverineri ashimira abayitabiriye anasaba abayobozi gukomeza kwegera abaturage no kubakemurira ibibazo mu bufatanye n'izindi nzego ku rwego rwabo ibikeneye ubuvugizi bugakorwa hakiri kare.  Umuturage agomba gukomeza kuba ku isonga ry'ibimukorerwa.

Ibikorwa bijyanye n' Ukwezi kw'Imiyoborere Myiza mu Karere ka Musanze bizakorerwa mu Mirenge yose 15 igize Akarere ka MUSANZE. Biteganyijwe ko ibikorwa by'uku kwezi bizasozwa kuwa 25/10/2022.

#UmuturageKuIsonga.

Kamanzi Jean Bosco

Ag PRMCO