Kuri uyu wa Gatanu, tariki ya 24 Mata 2026, mu Bitaro Bikuru bya Ruhengeri habereye igikorwa cyo kwibuka ku nshuro ya 32 Jenoside yakorewe Abatutsi mu 1994, hibukwa by'umwihariko Abatutsi bari abakozi b’ibitaro n’Ibigo Nderabuzima bibishamikiyeho, abarwayi, abarwaza n’abandi Batutsi baganaga ayo mavuriro. 

Iki gikorwa cyitabiriwe n’Abayobozi batandukanye barimo Guverineri w’Intara y’Amajayaruguru Mugabowagahunde Maurice, Umuyobozi w’Akarere Nsengimana Claudien, Visi Meya ushinzwe Imibereho Myiza Kayiranga Theobald, Ubuyobozi bwa Ibuka mu Karere ka Musanze, Avega Agahozo, Inzego z’umutekano n’abandi. 

Mu butumwa bwe, Guverineri Mugabowagahunde yihanganishije Abarokotse Jenoside yakorewe Abatutsi, asaba urubyiruko kwitabira ibikorwa byose bitaganyijwe mu gihe cy'iminsi 100 yo Kwibuka, kwitabira Gahunda ya Ndi Umunyarwanda no kunyomoza abagoreka amateka y'Igihugu. Guverineri yasabye abakozi b’Ibitaro by Ruhengeri kwirinda icyatera amacakubiri mu bakozi, gukora ibitandukanye n'iby'abakozi bagize uruhare muri Jenoside yakorewe Abatutsi no guharanira gutanga serivisi nziza.

Visi Perezida wa Ibuka mu Karere ka Musanze Karemanzira Fidele yasabye ubuyobozi bw’Ibitaro kuzasigasira amateka cyane ko bigeye kuvugururwa, asaba ubuyobozi bw’inzego bwite za Leta ko bwakomeza gutegura ibikorwa byo Kwibuka Jenoside yakorewe Abatutsi no mu bindi bigo bya Leta ndetse n’iby’abikorera bifite amateka yihariye.

Atanga ikaze, Umuyobozi Mukuru w’Ibitaro bya Ruhengeri Dr. Philbert Muhire yihanganishije Abarokotse Jenoside yakorewe Abatutsi, avuga dufite ubuyobozi bwiza bwifuriza ineza abayarwanda, butabaremamo amacakubiri ahubwo bushishikajwe n'ubumwe n'ubudaheranwa bw'abanyarwanda.

Iki gikorwa cyabanjirijwe n'urugendo rwo Kwibuka rwatangiriye ku bitaro berekeza ku Rwibutso rw'Akarere, umuryango mugari w’Ibitaro bya Ruhengeri, abayobozi n’abaturage bunamiye Abatutsi bashyinguwe mu Rwibutso rw'Akarere Cour d'Appel de Ruhengeri. Muri iki gikorwa kandi imiryango itatu y’abarokotse Jenoside Yakorewe Abatutsi yaremewe mu rwego rwo kuyifasha gukomeza kwiyubaka no guharanira ubudaheranwa.