Muri gahunda yo gusura no gukurikirana Ibigo by’Amashuri hagamijwe kuzamura Ireme ry’Uburezi, ku gicamunsi cyo kuri uyu wa Gatanu tariki ya 29 Ukwakira 2021, Minisitiri w'Uburezi, Dr.UWAMARIYA Valentine, yasuye GS MUSANZE I, rimwe mu Mashuri Yisumbuye abarizwa mu Murenge wa Musanze, mu Kagari ka Rwambogo, mu Mudugudu wa Gakoro (9YBE).

Muri uru ruzinduko rw’akazi yagiriye mu Karere ka Musanze, yakiriwe n’Umuyobozi w’Agateganyo w’Akarere, Bwana BAGIRISHYA Pierre Claver, Umuyobozi w’Ishuri, Bwana NIZEYIMANA Emmanuel, Umuyobozi w’Ishami ry’Uburezi mu Karere n’abandi, asura ibice bitandukanye birimo na Smart Classroom, Laboratoy, ibyumba byigirwamo, igikoni, ... .

Mu kiganiro bagiranye, Minisitiri yashimiye abarezi uburyo bitanga mu murimo uhatse byose mu iterambere ry’Igihugu no mu mibereho myiza y’abagituye, by’umwihariko muri ibi bihe bidasanzwe by’Icyorezo cya COVID-19, aho bigisha bambaye agapfukamunwa n’abana ubwabo, kandi intego y’isomo ikagerwaho. Yakomeje  ababwira ko ibibazo bitandukanye bafite bizwi kandi  biganirwaho kenshi, bimwe na bimwe bikagenda bibonerwa ibisubizo, ibisigaye bikagumna ku rutonde, nk’uko nabo babibera abagabo bo kubihamya.

Ku ruhande rw’abana, yabasabye kurushaho kwiga neza no gutanga umusaruro bategerejweho; ibi bakabigeraho binyuze mu gukorera ku mihigo, kurangwa n'ikinyabupfura kandi buri wese akiha intego ashaka kuzageraho.

Muri rusange, yashimye uko yasanze ir ishuri rihagaze by’umwihariko isuku, kuba abana bose bafatira ifunguro ku ishuri, ibikoresho bigezweho, abafatanyabikorwa, …, bityo asaba ko imitsindire yarushaho kuzamuka.