Kuri iki gicamunsi cyo kuri iki Cyumweru tariki ya 26 Ukuboza 2021, mu rwego rwo gukomeza guhuriza hamwe imbaraga kw'Inzego mu guhangana n'Icyorezo cya COVID-19, Minisitiri w'Ubutegetsi bw'Igihugu, Hon.GATABAZI Jean Marie Vianney, yagiriye Uruzinduko rw'Akazi mu Karere ka Musanze. 

Akigera muri aka Karere, Minisitiri yakiriwe na Guverineri w'Intara y'Amajyaruguru, Madamu NYIRARUGERO Dancille, wari kumwe n'Umuyobozi w'Akarere ka Musanze, Bwana RAMULI Janvier, Inzego z'Umutekano, Umuyobozi w'Akarere ka Musanze Wungirije Ushinzwe Imibereho Myiza y'Abaturage n'Umuyobozi Mukuru w'Ibitaro Bikuru bya Ruhengeri. Aba bose bakaba bahurije ku kumushimira ubufatanye buhoraho n’ubuvugizi igihe cyose bibaye ngombwa mu gusigasira umudendezo w’abaturage.

Muri uru ruzinduko, yagiranye ikiganiro n'Abagize Command Post yo Kurwanya COVID-19 ku Rwego rw'Akarere, cyari cyanitabiriwe n'Abanyamabanga Nshingwabikorwa b'Imirenge yose, cyabereye mu Cyumba Kinini cy'Inama cy'Akarere.

Mu ijambo rye, yatangiye ashimira byimazeyo uruhare rw'Uturere mu Iterambere ry'Igihugu no mu Mibereho y'Abagituye muri rusange,  akomeza ashima by’umwihariko ubufatanye mu guhangana n’iki cyorezo ariko asaba akomeje ko hakorwa ibishoboka byose kugira ngo igikorwa cyo gukingira cyihutishwe, kigere ku baturage bose cyateganyirijwe kandi n'ingamba zose zo gukumira ikwirakwizwa ryacyo muri rusange zirusheho kubahirizwa.

Yabivuze muri aya magambo: "Twashimye intambwe Akarere ka Musanze mumaze kugeraho mu Gikorwa cyo gukingira abaturage, aho abagera ku 222,551 bamaze kubona Urukingo hanyumamuri bo 166,419 bakaba baramaze gukingirwa byuzuye. Tuganiriye ku ngamba zo kugera ku baturage bose mu buzima busanzwe n'izo gukomeza gukumira iki cyorezo mu Karere nk’aka, gafite Umujyi wa Kabiri kuri Kigali. Mubizirikane".

Abitabiriye bakaba babonye umwanya uhagije wo kugaragaza imbogamizi bagenda bahura nazo, uko bahangana nazo n'ibibazo bikeneye ubuvugizi mnu zindi Nzego.