Kuri uyu wa 3 Ukuboza, Akarere ka Musanze kifatanyije n'isi yose mu kwizihiza Umunsi mpuzamahanga w'Abantu bafite Ubumuga, ku nsanganyamatsiko iragira iti: “Dushyigikire umuryango udaheza abantu bafite ubumuga, Duteze imbere imibereho myiza". Ku rwego rw'Akarere kwizihiza uyu munsi mpuzamahanga byabereye mu Murenge wa Shingiro, byitabirwa n'Umuyobozi w'Akarere Bwana NSENGIMANA Claudien n'abafatanyabikorwa batandukanye bagira uruhare mu guteza imbere abantu bafite ubumuga.

Kwizihiza umunsi mpuzamahanga w'Abantu bafite ubumuga byaranzwe no kuremera abatishoboye bafite ubumuga mu rwego rwo kufasha mu iterambere ry'imibereho myiza yabo. Hope And Homes For Children Rwanda Hope And Homes For Children Rwanda yatanze amagare yagenewe abafite ubumuga 16, Ubumwe Community Center Musanze itanga inkoni yera ku bantu batite ubumuga 18.

Koperative Dukomezubuzima y'Abantu bafite ubumuga yatanze umusanzu wa EjoHeza, uwo gushyigikira gahunda yo gufatira ifunguro ku ishuri n'ibiribwa bitandukanye bifite agaciro k'ibihumbi 198,000.

Umuyobozi w'Akarere Bwana NSENGIMANA Claudien yashimye abafatanyabikorwa bagira uruhare mu iterambere ry'Abafite ubumuga, asaba abaturage gushyigikira umuryango udaheza abafite ubumuga, barwanya ko hagira uvutswa uburenganzira bwe n'amahirwe agenewe bose azira kuba afite ubumuga.