Mu Murenge wa Kinigi habereye igikorwa Kwibuka ku nshuro ya 32 Jenoside yakorewe Abatutsi mu 1994, by'umwihariko kwibuka Abatutsi biciwe mu cyahoze ari Komini ya Kinigi, Umunyamabanga Nshingwabikorwa w'Intara y'Amajyaruguru, NGENDAHIMANA Pascal ni we mushyitsi mukuru.

Iki gikorwa cyitabiriwe na Komite Nyobozi y’Akarere, cyabanjirijwe n'urugendo rwo Kwibuka rwatangiriye ku biro by'Umurenge wa Kinigi rwerekeza ku Rwibutso rwa Jenoside yakorewe Abatutsi rwa Kinigi no kunamira Abatutsi baruhukiye muri urwo Rwibutso.

Atanga ikaze, Umuyobozi w'Akarere Nsengimana Claudien yihanganishije imiryango y'Abarokotse Jenoside yakorewe abatutsi, ashimangira ko twibuka dusubiza agaciro Abatutsi biciwe mu yari Komini ya Kinigi. ysabye abaturage kwima amatwi abashaka kudusubiza mu mateka mabi twanyuzemo.

Mu kiganiro ku mateka ya Jenoside yakorewe Abatutsi, Ngarambe Vedaste yavuze ko ingangabitekerezo ya Jenoside yinjiye mu bantu kuko bigishijwe,izasohoka mu bantu kuko bigishijwe.Yashimiye Ingabo zahagaritse Jenoside zikarokora Abatutsi bicwaga, asaba abaturage gukomera ku bumwe.

Mu butumwa bwe, Umunyamabanga Nshingwabikorwa w'Intara y'Amajyaruguru Ngendahimana Pascal yakomeje abarokotse Jenoside yakorewe Abatutsi mu cyahoze ari Komini ya Kinigi, yizeza abarokotse Jenoside ko Leta izakomeza kubaba hafi no kubasha uko bishoboka kose. Yavuze ko Kwibuka Jenoside yakorewe Abatutsi mu cyahoze ari Komini ya Kinigi ari umwanya wo kunyomoza abagoreka amateka, bavuga ko ihanurwa ry'indege ya Habyarimana ariryo ryabaye imbarutso ya Jenoside kuko abenshi bishwe, bishwe mbere y'ihanurwa ry'iyo ndenge. Muri iki gikorwa, uwarokotse jenoside yahawe inka mu rwego rwo kumufasha kurushaho kwiyubaka.