Kuri uyu wa Gatatu tariki ya 15 Mata 2026, Minisitiri w’Ingabo z’u Rwanda, Juvenal Marizamunda, afatanyije n’intumwa za Inteko Ishinga Amategeko n’iz’Urwego rw’Ubucamanza, hamwe n’abandi bayobozi batandukanye, bifatanyije n’Abanya-Musanze mu gikorwa cyo Kwibuka ku nshuro ya 32 Jenoside yakorewe Abatutsi, hibukwa by’umwihariko abiciwe mu cyahoze ari Cour d’Appel de Ruhengeri n’abaroshywe mu mugezi wa Mukungwa.

Abitabiriye iki gikorwa, bunamiye Abatutsi baroshywe mu mugezi wa Mukungwa, mu rwego rwo kubaha icyubahiro no kuzirikana ubuzima bwabo.

Mu bitabiriye iki gikorwa harimo kando ubuyobozi bw’uturere twa Gakenke, Gicumbi na Burera, abahagarariye Ibuka mu Turere twa Musanze na Gakenke, Amadini n’amatorero, Imiryango yibuka ababo baroshwe mu mugezi wa Mukngu n’abiciwe mu cyahoze ari Cour d’Appel de Ruhengeri.

Mu butumwa bwe, Minisitiri Juvenal Marizamunda yavuze ko Jenoside yateguwe ikanashyirwa mu bikorwa n’ubuyobozi bubi, ashimangira ko Kwibuka ari inshingano ya buri Munyarwanda. Yasabye buri wese guhangana n’abahakana n’abapfobya Jenoside yakorewe Abatutsi, ndetse n’abakwirakwiza ingengabitekerezo yayo.

Ku ruhande rwe, Guverineri w’Intara y’Amajyaruguru, Bwana Gahundema Maurice, yagaragaje ko Kwibuka bidufasha gukomeza inzira y’ubumwe n’ubudaheranwa, anashimangira ko ibyabereye mu ngoro y’ubutabera byerekana ugutsindwa gukomeye kw’inzego zari zishinzwe kurengera abaturage.

Mu ijambo ry’ikaze, Umuyobozi w’Akarere ka Musanze, Bwana Nsengimana Claudien, yihanganishije imiryango y’abacitse ku icumu rya Jenoside yakorewe Abatutsi, abasaba gukomeza kugira ubutwari bwo kwihangana no gukomeza urugendo rwo kwiyubaka.

Yashimangiye ko Jenoside yakorewe Abatutsi yaranzwe n’ubugome bukabije, aho Abatutsi bambuwe ubuzima bazira uko bavutse, bakabwamburirwa aho bariguhabwa ubutabazi, ashimangira ko nta handi tuzi ku isi byabaye, kuko aho bari guhererwa ubutabera ariho bamburiwe ubuzima.