Aya ni amwe mu magambo yabwiwe Abayobozi b'Abamashami ya REG na WASAC mu Karere ka Musanze bari kumwe n'abakozi bose bakorera mu Karere ka Musanze kuri uyu wa 3 tariki ya 07/12/2022  muri gahunda y'icyumweru cyahariwe ubukangurambaga k'ukurwanya Ruswa mu Nsanganyamatsiko igira iti: "TWIMAKAZE INDANGAGACIRO ZO KURWANYA RUSWA, INKINGI Y'ITERAMBERE RIRAMBYE".

Umuyobozi w'Akarere ka Musanze Bwana RAMULI Janvier akaba n'Umuyobozi w'Inama Ngishwanama yo Kurwanya Ruswa n'Akarengane ku rwego rw'Akarere, ari kumwe n'Umushinjacyaha Mukuru mu Karere ka Musanze Bwana BARAJIGINWA Diogène, DPC - Musanze SP Elvis MUNYANEZA na bamwe mu bagize inama y'umutekano itaguye y'Akarere, uyu munsi bagiranye ikiganiro n'Abayobozi n'abakozi b'Ibigo bya REG na WASAC byo mu Karere ka Musanze bishinzwe kugeza ku baturage Serivisi z'umuriro w'amashanyarazi n'iz'amazi. Baganiriye by'umwihariko ku KU MITERERE YA RUSWA, ITEGEKO N'IBIHANO KU CYAHA CYA RUSWA N'INGARUKA ZA RUSWA KU BUZIMA RUSANGE N'ITERAMBERE BY'IGIHUGU.

Muri ibi biganiro, abakozi ba REG na WASAC basabwe guca ukubiri n'imikorere mibi yo kudatanga serivisi nziza ku bagenerwabikorwa/abakiliya b'Ibigo bakorera. By'umwihariko basabwe: guca ukubiri n'umuco wa bamwe basaba abakiliya amafaranga bita ay'urugendo/aya moto kugira ngo bajye gukorera umufatabuguzi kuri serivisi yasabye, kwirinda gutinza nkana serivisi zitangwa (gusaba cash power, gusaba konteri,...), kwirinda ikimenyane, kwirinda kuba ba Komisiyoneri b'abacuruza cyane cyane ibikoresho by'amazi,...

Abafashe amagambo bose basabye abitabiriye bose kwirinda icyaha cya Ruswa iyo ariyo yose kuko ari imungu y'Ubukungu n'Iterambere by'Igihugu. Bityo, banasabwe kwirinda ingaruka za Ruswa harimo n'igifungo giherekejwe n'ihazabu bigenwa n'Itegeko ryo guhana icyaha cya Ruswa. Hashingiwe ku bushakashatsi bwakozwe na RGB, bamenyeshejwe ko muri rusange abaturage b'Akarere ka Musanze bishimira ibyagezweho mu rwego rw'ibikorwaremezo by'amazi n'amashanyarazi ariko abaturage b'Akarere ka Musanze babajijwe mu gihe cy'ubushakashatsi bagaragaje ko batishimira ikigero cya serivisi bahabwa mu kugezwaho serivisi zijyanye n'amazi n'amashanyarazi. Bityo, abakozi bose basabwe guharanira ko ibyanenzwe byose bihinduka mu guteza imbere isura nziza y'Akarere  ka Musanze n'Igihugu muri rusange (cyane ko Musanze idatuwe cg ngo ikoreremo gusa abanyarwanda...) buri wese mu nshingano ze abigizemo uruhare hazirikanwa ko Kwaka/Gusaba, Kwakira cyangwa Gutanga Ruswa iyo ariyo yose bigomba gufatwa na buri wese nk'ikizira. 

Ibiganiro byasojwe hashimwa imikoranire hagati y'Ibigo bya REG, WASAC n'Akarere ka Musanze. Impande zose ziyemeje gukomeza ubufatanye mu kurwanya no gutahura abangiza ibikorwaremezo by'amashanyarazi n'iby'amazi.

Kamanzi Jean Bosco

Ag PRMCO