Kuri uyu wa gatatu tariki ya 19 Ukwakira 2022, Umuyobozi w'Akarere Bwana RAMULI Janvier yakiriye Guverineri w'Intara y'Amajyaruguru Madamu NYIRARUGERO Dancille ari kumwe n'abagize inama y'umutekano itaguye y'Intara barimo Umuyobozi w'Inkeragutabara Major General MUROKORE Eric, Umuyobozi wa Polisi y'Igihugu CSP MUHETO Francis, Umuyobozi wa RIB mu Ntara y'Amajyaruguru n'abandi. Bari baje gusura Umurenge wa BUSOGO kuganira n'abaturage. Baganiriye ku ruhare rwabo mu gushyira mu bikorwa gahunda za Leta zibateza imbere, uruhare rwabo mu gusigasira no gucunga umutekano,...

Guverineri yashimiye abaturage b'Umurenge wa Busogo ibikorwa by'iterambere bagenda bageraho, iterambere rya santeri y'ubucuruzi ya Byangabo, ubwitabire muri gahunda ya EJO HEZA,... Yabasabye gukomeza kwitabira umurimo, gutanga umusanzu w'Ubwisungane mu kwivuza "Mutuelle de Sante", kugira isuku, kurwanya imirire mibi n'igwingira mu bana bato, gukomeza kugira uruhare mu gukemura ibibazo bikibangamiye imibereho myiza yabo (kubaka ubwiherero, kubaka ibiraro by'amatungo byihariye kugira ngo hirindwe kuraza amatungo mu nzu abantu bararamo,...), kwirinda amakimbirane mu miryango bubaka umuryango utekanye kandi ushoboye, gukomeza kurwanya isuri, gukomera .ku bumwe n'Ubudaheranwa by'abanyarwanda, kwirinda kwiyandarika n'indi mico mibi nk'ubusinzi, urugomo,...

Abitabiriye inama basabwe gukomeza gukumira Icyorezo cya EBOLA cyagaragaye mu Gihugu cy'abaturanyi cya Uganda, basabwa ko birinda cyane cyane gukora ingendo zitari ngombwa muri icyo Gihugu. Abaturage bahawe umwanya wo gutanga ibitekerezo no kubaza ibibazo. Ibibazo byabajijwe byahawe ibisubizo ibindi bihabwa umurongo w'uko byakemurwa. Abaturage bishimiye cyane impanuro bahawe.

KAMANZI Jean Bosco

Ag PRMCO