Kuri uyu wa mbere tariki ya 03 Ukwakira 2022 mu Karere ka Musanze, mu Murenge wa Cyuve Akagari ka Bukinanyana, hatangijwe Ukwezi kwahariwe Ubumwe n'Ubudaheranwa by'Abanyarwanda. Uku kwezi gufite insanganyamatsiko igira iti: "Uruhare rwa buri Munyarwanda mu Kwimakaza Ubumwe n'Ubudaheranwa by'Abanyarwanda". 

Umuyobozi w'Akarere Bwana RAMULI Janvier ni we watanze ikaze ku bitabiriye iki gikorwa bose. Umushyitsi Mukuru yari Nyakubahwa Minisitiri w'Umutekano mu Gihugu Bwana GASANA Alfred ari kumwe na Guverineri w'Intara y'Amajyaruguru Mme NYIRARUGERO Dancille, Perezida w'Inama Njyanama y'Akarere ka Musanze Bwana NDAYAMBAJE Michel, Umuyobozi w'Akarere Wungirije Ushinzwe Imibereho Myiza y'Abaturage Madamu KAMANZI Axelle, Intumwa ya MINUBUMWE Madamu MBABAZI Zakhia (Partnership and Cooperation Analyst), Abayobozi mu nzego z'ibanze mu Mirenge yose igize Akarere ka Musanze, Abayobozi mu nzego z'umutekano n'abaturage mu ngeri zitandukanye.

Mu ijambo rye, Guverineri  w'Intara y'Amajyaruguru yasabye abaturage b'Intara y'Amajyaruguru gukomera ku Bumwe kuko arizo mbaraga zacu nk'abanyarwanda. Yijeje Umushyitsi Mukuru muri iki gikorwa ko abaturage b'Intara y'Amajyaruguru bazakomeza kwimakaza ubumwe, kugira gahunda ya NDI UMUNYARWANDA ubuzima bwabo bwa buri munsi, guharanira  kubaka ejo hazaza h'u Rwanda mu bwitange no gukunda Igihugu.

Atangiza Ukwezi kwahariwe Ubumwe n'Ubudaheranwa mu Banyarwanda, Minisitiri w'Umutekano yagize ati: "Ubuyobozi bwiza bwa HE Paul KAGAME bwatubereye isoko y'ubudaheranwa tugomba kubakiraho kgo dukomeze dusigasire ibyagezweho mu rwego rw'ubumwe n'imibanire". Yasabye abitabiriye iki gikorwa gukomera kuri NDI UMUNYARWANDA ikajya mu buzima bwa buri munsi no kudaha icyuho ababa bashaka guhungabanya ubumwe n'umutekano by'u Rwanda ahubwo  bagakomeza gusigasira umutekano buri wese abigizemo uruhare kdi buri wese akaba ijisho rya mugenzi we. Ni ngombwa gukomeza kugendera kure icyo aricyo cyose cyazana amacakubiri mu Banyarwanda, gukomeza gurwanya ingengabitekerezo ya jenoside mu buryo bwose. Igikorwa cy'uyu munsi cyaranzwe n'imbyino, indirimbo zirimo ubutumwa bukangurira abantu bose gukomera ku bumwe, gukunda umurimo no gukunda Igihugu.

Uku kwezi kose kuzarangwa n'ibikorwa bitandukanye bigamije kwimaza Ubumwe n'Ubudaheranwa mu Banyarwanda.

KAMANZI Jean Bosco

Ag PRMCO