Kuri uyu wa Gatatu tariki ya 26 Mutarama 2022, mu Karere ka Musanze hatangijwe ku mugaragaro Ikigo Gihanga Udushya Hifashishijwe Ikoranabuhanga, "MUSANZE TECH-INNOVATION HUB", by'umwihariko ku Rubyiruko.

Uyu muhango witabiriwe na Guverineri w'Intara y'Amajyaruguru, Madamu NYIRARUGERO Dancille, wari Umushyitsi Mukuru na Ambasaderi w'Ubuyapani, HE H.E Masahiro IMAI, H.E Masahiro IMAI  n'Itsinda bari kumwe ryarimo n'Intumwa ya MINICT ikorera mu Kigo cya RISA n' Abagize Inama y'Umutekano Itaguye ku Rwego rw'Intara y'Amajyaruguru. Bakiriwe n'Umuyobozi w'Akarere, Bwana RAMULI Janvier, wari kumwe n'abandi Bayobozi batandukanye ku Rwego rw'Akarere no muri uyu Murenge byabereyemo.

Umuyobozi w'Agateganyo w'Ikigo cy'Urubyiruko abatambagiza 

Bimwe mu bihakorerwa 

Nyuma yo gusura ibice bitandukanye bigize iki Kigo n'ibihakorerwa, hatanzwe ubutumwa bwahurizaga ku kwishimira umubano uri hagati y'Ibihugu byombi no guhamagarira abagenerwabikorwa kuwusigasira no kuwubakiraho barushaho gukataza mu iterambere.

Umuyobozi w'Akarere mu ijambo ry'ikaze

HE Amb ashimangira uburyo Iguhugu cy'Ubuyapani kitazahwema gushyigikira u Rwanda mu rugamba rw'iterambere

Mu izina ry'Ubuyobozi n'iry'Abaturage, Guverineri ashimira Abafatanyabikorwa anabizeza kubungabunga no kubyaza umusaruro inyunganizi yabo

Izi mpano zahawe Abashyitsi nazo ziri mu bihakorerwa

Bafata ifoto rusange, impande zombi zishimira ubu bufatanye

Iki Kigo gikorera mu Nyubako y'Ikigo cy'Urubyiruko cy'Akarere "YEGO CENTER", inyuma y'Ibiro by'Umurenge wa Muhoza, ari nawo kibarizwamo, mu Mujyi, ibumoso bw'Umuhanda Munini Musanze- Rubavu, kikaba cyarashyizweho ku bufatanye bw'Igihugu cy'u Buyapani, binyuze mu Kigo cyabwo Gishinzwe Iterambere Mpuzamahanga (JICA), na Leta y'u Rwanda, binyujijwe mu Kigo Gishinzwe Ikoranabuhanga mu Itumanaho n'Isakazabumenyi (RISA) kibarizwa muri Minisiteri y’Ikoranabuhanga na Inovasiyo, gahunda iteganyijwe kugera mu Mijyi yose Yunganira Umujyi wa Kigali.

Ibi byose akaba ari amahirwe akomeye mu gufasha abantu kubyaza umusaruro indoto n'ubumenyi bifitemo kubera amahugurwa ahatangirwa, ibikoresho by'ibanze bihari n'amakuru ahatangirwa abafasha kumenya ibibera hirya no hino haba imbere mu Gihugu ndetse no hanze yacyo, dore ko kuri iki Kigo cy'Urubyiruko ari naho dusanga Ikigo Gihuza Abashaka Akazi n'Abagatanga, "Musanze Employment Service Center".