Kuri uyu wa Mbere tariki ya 22 Gashyantare 2021, mu Karere ka Musanze hatangijwe ku mugaragaro Icyumweru Cyahariwe Kwita ku Buzima bw'Umwana n’Umubyeyi, kimwe n'ahandi hose mu Gihugu, gisanzwe kiba inshuro ebyiri buri Mwaka. Ku Rwego rw'Akarere, cyatangirijwe mu Murenge wa Kinigi, mu Kagari ka Nyonirima, mu Mudugudu wa Gahisi, ku Kigo cy'Amashuri Abanza cya Kabwende.

Uyu muhango witabiriwe n'Umuyobozi w'Akarere Wungirije Ushinzwe Imibereho Myiza y'Abaturage, Madamu KAMANZI Axelle, wari  Umushyitsi Mukuru muri iki gikorwa, wari kumwe n'Umuyobozi Mukuru w'Ibitaro Bikuru bya Ruhengeri, Dr. MUHIRE Philbert, Intumwa ya RBC muri iki Cyumweru mu Karere ka Musanze n'aka Gakenke, Madamu DUKUZIMANA Marie Josee, ndetse n'Umuyobozi w'Agateganyo w'Ishami ry'Ubuzima muri aka Karere. Bakiriwe n'Umugenzuzi w'Uburezi muri uyu Murenge n'Umuyobozi w'Ikigo Nderabuzima cya Kinigi.

Muri iki gikorwa, basobanuriye abana impamvu nyamukuru y'iki Cyumweru, babaha ikinini kibarinda inzoka zo mu nda, baboneraho kubibutsa ko Igihugu kibakunda, ko icyo kibasaba ari ukugira isuku aho bari hose, kwirinda ababashuka, kwirinda ingeso mbi zirimo ubuzererezi no kunywa ibiyobyabwenge, kwiga cyane no kubishishikariza abandi no guhora bazirikana ko ejo heza h'u Rwanda hari mu biganza byabo.

Muri uyu Mudugudu kandi, iri tsinda ryanakurikiranye iyi gahunda aho irimo gukorerwa mu Midugudu ku bufatanye bw’Abajyanama b'Ubuzima na ba Mutwarasibo, aho ababyeyi bakanguriwe konsa abana nibura kugeza ku myaka ibiri, kugira isuku kugira ngo batababera intandaro yo kwandura indwara ziterwa n'umwanda, kubahiriza gahunda yo kubakingiza, kwirinda no kubarinda indwara ya marariya barara mu nzitiramubu, batema ibihuru banasiba ibizenga by’amazi, kubahiriza gahunda yo kuboneza urubyaro no guhamagarira abadamu batwite kwipimisha inshuro zose zagenwe bakimara kumenya ko basamye.

Aha, by'umwihariko, mu izina ry'Ubuyobozi bw'Akarere, Umushyitsi Mukuru yashimiye Abarezi uruhare rwabo mu kurerera Imana n’Igihugu kubera ko ubujiji ari umwanzi w’iterambere n’imibereho myiza. Yakomereje ku musanzu uhoraho w’Abajyanama b’Ubuzima  mu kubungabunga Umunyarwanda muri rusange no kuva akiri mu nda by'umwihariko.

Mu gusoza, abaganirijwe bose bagiye bahabwa ubutumwa rusange bwo kuba abakangurambaga b’ukuri mu gushishikariza abandi guhuriza hamwe imbaraga mu gukomeza guhashya icyorezo cya COVID-19 no kwimakaza umuco w'isuku.

Nyuma yo gukaraba intoki, abana bahabwa ikinini kibarinda inzoka zo mu nda

Umushyitsi Mukuru ahamagarira abana kumenya icyo Igihugu kibifuzaho

Mu kiganiro n'Abajyanama b'Ubuzima