Kuva Icyorezo cya COVID-19 cyatangira kwibasira Isi kitaretse n'Igihugu cyacu, Akarere ka Musanze kagenda gashyiraho akako mu kwirinda no kurinda abanda ariko kakagira n’amahirwe yo kunganirwa n'Abafatanyabikorwa batandukanye mu gukangurira abatuye muri Musanze, abahakorera n'abahagenda kurushaho kwitwararika mu kubahiriza amabwiriza n'ingamba zo gukumira ikwirakwizwa ryacyo.

Ni muri urwo rwego kuri uyu wa Kabiri tariki ya 22 Kamena 2021, kuri AUBERGE IKAZE mu Murenge wa Muhoza, hatangiye Amahugurwa y'iminsi 3, yateguwe ku bufatanye na WORLD RELIEF, azatangwa mu byiciro 3 bitandukanye, mu rwego rwo kwirinda ubucucike, ajyanye n’Umushinga wayo Mushya wiswe "SCOPE COVID-19".

Mu izina ry'Ubuyobozi bw'Akarere, aya mahugurwa yatangijwe ku mugaragaro n'Umuyobozi w'Agateganyo w'Ishami ry'Ubuzima, Madamu MUKAGAJU Odette, washimiye Abafatanyabikorwa bityo akaboneraho gusaba abahugurwa gukurikirana ubushishozi amahugurwa bazirikana ko barimo guhugurwa nk’abazahugura abanda bitryo aboneraho kubasaba kuzaba intumwa nyazo muri uru rugamba baba intangarugero aho bari hose bahereye iwabo mu ngo. Yari kumwe na Madamu KARIBAGIZA Sonia, Umuyobozi w’uyu mushinga (Scope COVID-19 Programme Manager).

Uyu munsi rero hakaba hahuguwe Abashinzwe Imibereho Myiza/Ubuzima mu Mirenge, Umuhuzabikorwa wa Youth Volunteers muri buri Murenge, Umuyobozi wa Energy Radio n'uwari uhagarariye RC Musanze, Uhagarariye RFTC n'Abakorerabushake ba World Relief mu Mirenge itatu ikoreramo ariyo Shingiro, Nyange na Remera naho ibyiciro 2 bisigaye,  aribyo Abahagarariye Amadini n’Amatorero ndetse n’Abajyanama b’Ubuzima bazaba bahagarariye abandi, bakaba bazahugurwa ku minsi itandukanye uhereye ku munsi w’ejo.

Bahuguwe na bamwe mu Bagize Command Post yo Kurwanya COVID-19 ku Rwego rw'Akarere, hasangirwa amakuru ku ishusho y'iki cyorezo muri rusange no mu Karere ka Musanze by'umwihariko, ibihuha  bivugwa kuri iki cyorezo n'uburyo bwo kubirwanya babifashijwemo no gukurikirana amakuru umunsi ku wundi, gutanga amakuru ku bibangamiye intera imaze guterwa no gusobanuza ibyo batumva neza kandi ku Nzego zizewe kubera ko ntawe utanga icyo adafite. Ibi bigashimangirwa n'uko nabo bazaba bitwaye kugira ngo ibyo bavuga bijyanekoko n'ibyo bakora.

Aha abitabiriye bakaba bahawe umwanya uhagije wo kugaragaza urutonde rw'ibice bitandukanye mu Mirenge baturutsemo  bigikeneye ubukangurambaga bwihariye muri iyi ntambara ikomeje kwiziringa.

Uretse ubu bukangurambaga kandi, WORLD RELIEF ikaba isanzwe ifatanya n'Akarere muri Gahunda zitandukanye za Leta muri rusange, by'umwihariko mu kurushaho kuzamura imibereho myiza y'abaturage harimo kwihangira umurimo ndetse n'inyigisho z'isanamitima.

#SINDOHOKA!