Kuri uyu wa Gatatu tariki ya 19 Gicurasi 2021, mu Karere ka Musanze habereye Umuhango wo Gutangiza ku Mugaragaro Umushinga witwa "TUMENYE SINEMA", wabereye mu Cyumba cy'Inama cya FATIMA Hotel.

Ni umushinga uterwa inkunga ukorera mu Turere tune mu Gihugu, uterwa inkunga na Amambasade y'Ubumwe bw'Ibihugu by'Uburayi, ushyirwa mu bikorwa na MASHARIKI AFRICAN FILM FESTIVAL (MAFF), ku bufatanye na GOETHE INSTITUTE.

Intego zawo ni ukongerera ubumenyingiro n'ubushobozi urubyiruko rukora Umwuga wa Sinema, gushyiraho urubuga ruhuza ibikorwa byibanda mu guteza imbere inkuru zikorerwa mu Rwanda, gushishikariza urubyiruko kwihangira imirimo no kurukangurira kugaragaza impano zabo babinyujije mu kubara inkuru no gufasha urubyiruko 400 kwihangira imirimo muri firime.

Muri uyu Muhango, Umushyitsi Mukuru yari Ambasaderi wa European Union mu Rwanda, wari kumwe n’Umuyobozi Mukuru muri Minisiteri y'Urubyiruko n'Umuco Ushinzwe Guteza Imbere Umuco n'abandi Bayobozi bakurikirana iyi gahunda.

Bakiriwe n'Umuyobozi w'Akarere ka Musanze, Madamu NUWUMUREMYI Jeannine, wabashimiye byimazeyo aya mahirwe aje yiyongera ku yandi yari asanzwe aboneika muri aka Karere no mu Gihugu muri rusange, aho Ubuyobozi burajwe ishinga no guca ubushomeri by’umwihariko mu Rubyiruko, ari nako runatozwa umuco wo kwishakamo ibisubizo bahereye ku mpano bifitemo, ku bufatanye n’Abafatanyabikorwa mu Iterambere imbere no hanze y’u Rwanda.

 Aha, akaba yaboneyeho gushimira urubyiruko rwari rumaze iminsi mu mahugurwa yabyo kuba rwarafashe iki cyemezo bityo arusaba gushikama bakabyaza umusaruro izi mbuto bakesha Igihugu kiyobowe neza kandi kibakunda no kuba intumwa mu gutinyura bagenzi babo kugira ngo bashobore gufatanya mu gutegura ejo hazaza. Ibi bakabigeraho bayobowe n'Indangagaciro na Kirazira by'Umuco Nyarwanda.

Hari kandi n'Umunyamabanga Nshingwabikorwa w'Umurenge wa Muhoza uherereyemo ishuri ryigishirizwamo amasomo akubiye muri uyu mushinga, ririmo abakobwa n'abahungu baturuka hirya no hino mu Gihugu, barenga ijana, biga ku buntu, mu gihe kingana n'amezi atatu, mu byiciro, mu rwego rwo kugabanya ubucucike hubahirizwa ingama n’amabwiriza yo guhangana n’Icyorezo cya COVID-19.

Ku basanzwe bagenda muri Musanze, iri shuri rikorera ku Muhanda ujya aho bita i Nyakinama, kuri Nyamagumba, mu kuboko kw'iburyo, hafi y'ahahoze ibagiro.

Umuyobozi w'Akarere atanga ikaze

Umuyobozi Mukuru muri Minisiteri y'Umuco n'Urubyiruko asobanura iby'uyu Mushinga

Ambasaderi mu ijambo rikubiyemo ingingo zishimangira ubufatanye hagati y'Ibihugu byombi

Gucuranga inanga ni bimwe mu bizatezwa imbere n'uyu Mushinga

Abayobozi bafata Ifoto Rusange

Umuhango wabereye kuri Fatima Hoteli nyuma bakomereza ku Cyicaro cy'Ishuri, aho basuye uri Rubyiruko bakanabashyikiriza ibikoresho bitandukanye birimo na za kamera zifashishwa mu gufata amashusho, amajwi n'ibindi.

Ku Cyicaro cy'Ishuri: Umuyobozi waryo asobanura ibihakorerwa

 Batanga ibikoresho