"Iterambere ry'umugore wo mu cyaro, Inkingi y'iterambere ry'Igihugu cyacu": iyi ni insanganyamatsiko twizihiza kuri uyu munsi mpuzamahanga w'umugore wo mu cyaro. Mu Mirenge yose igize Akarere ka Musanze uko ari 15 umunsi mpuzamahanga w'umugore wo mu cyaro wizihijwe.

Ku rwego rw'Akarere uyu munsi wizihirijwe mu Murenge wa Nkotsi. Umuyobozi w'Akarere Bwana RAMULI Janvier niwe Mushyitsi Mukuru. Mu bandi bitabiriye uyu munsi harimo V/M ASOC Mme KAMANZI Axelle, Umuyobozi Wungirije wa PROFEMMES TWESE HAMWE Mme MUKAYIRANGA Annonciata, abahagarariye inzego z'umutekano Major MUSONI wari Uhagarariye Ingabo na DPC SP Elvis MUNYANEZA n'abandi, abafatanyabikorwa ACTION AID - Rwanda yari ihagarariwe na Anatole UWIRAGIYE na  AKWOS - Rwanda yari ihagarariwe n'Umuyobozi wayo Mme RWEMARIKA Félicité n'abaturage mu ngeri zitandukanye.

Ibirori byabimburiwe n'umukino w'umupira w'amaguru wahuje amakipe 2 y'abagore. Mu mukino wahuje abagore ba AKWOS n'abagore bari mu nzego z'ubuyobozi mu Karere ka Musanze warangiye Ikipe y'abagore bari mu nzego z'ubuyobozi itsinze iya AKWOS ibitego 3 ku busa. Ikipe yatsinze yashyikirijwe igikombe n'Umuyobozi w'Akarere afatanyije n'umuyobozi wa AKWOS. Wari umukino ubereye ijisho.

Abitabiriye kwizihiza uyu munsi mpuzamahanga w'umugore wo mu cyaro banejejwe cyane n'uyu munsi. Abagore bo mu cyaro n'abandi bose muri rusange barashima cyane Nyakubahwa Perezida wa Repubulika Paul KAGAME  ku mahirwe yahaye abanyarwandakazi yo kwiteza imbere kubera ihame ry'uburinganire n'ubwuzanye byatejwe imbere mu Gihugu cyacu. Byavuzwe na bamwe batanze ubuhamya uyu munsi. Byanagarutsweho ubwo hamirikwaga bimwe mu bikorwa bimaze kugerwaho n'abagore bushyize hamwe mu rwego rw'imyuga n'ubukorikori.

Kwizihiza umunsi w'umugore wo mu cyaro byanaranzwe n'ibikorwa bitandukanye birimo kuremera imiryango itishoboye 11 yahawe n'Akarere inka zo korora, 39 yahawe amashyiga arondereza ibicanwa "cana rumwe" n'amasuka ku bufatanye na ACTION AID - Rwanda n'iyahawe ibiribwa n'ibitenge bishya byo kwambara. Abahawe ubufasha babyishimiye cyane. Basezeranyije kuzakoresha neza ubufasha bahawe. Umunsi wanaranzwe n'imbyino, indirimbo no gucinya akadiho.

Umuyobozi Wungirije wa PROFEMMES TWESE HAMWE Mme Annonciata  MUKAYIRANGA yashimye iterambere rigenda rigerwaho n'abagore. Yashimiye cyane Leta y'u Rwanda kuri politiki nziza yashyizweho iteza imbere abanyarwandakazi n'umuryango nyarwanda muri rusange. Yashimye kandi ubufatanye n'Akarere anasaba abitabiriye gukomeza kuba ba Mutimawurugo.

Mu butumwa bwe, Umuyobozi w'Akarere yashimiye abitabiriye kwizihiza umunsi Mukuru mpuzamahanga w'umugore wo mu cyaro abasaba guharanira kugira umuryango ushobo, utekanye kandi wunze ubumwe kuko ari zo mbaraga z'umuryango no mu kuwuteza imbere. By'umwihariko yasabye abagore gukomeza kwiteza imbere ari nabyo biteza imbere abagize umuryango n'Igihugu. Yanibukije abagabo gukomeza kwita ku ihame ry'uburinganire n'ubwuzanye.

Kuri uyu munsi kandi hashimwe uruhare rw'Abafatanyabikorwa ACTION AID RWANDA na AKWOS mu gutegura no kwizihiza uyu munsi mpuzamahanga w'umugore wo mu cyaro. 

Kwizihiza uyu munsi byagenze neza mu Mirenge yose.

"ITERAMBERE RY'UMUGORE WO MU CYARO, INKINGI Y' ITERAMBERE RY'IGIHUGU"

Kamanzi Jean Bosco

Ag PRMCO