Ku wa Kabiri  Tariki 5 Nzeri 2023, Umuyobozi w' Agateganyo w' Akarere ka Musanze  Bwana Hamiss Bizimana yasinyanye Imihigo n' Abanyamabanga Nshingwabikorwa b' Imirenge   y' inzego z' imitegekere y' Igihugu zegerejwe abaturage y' umwaka wa  2023/2024. Iki gikorwa cyabereye mu cyumba mberabyombi cy' Akarere ; mu nama yayobowe n' Umuyobozi w' Agateganyo w' Akarere  afatanyije n' Umunyamabanga Nshingwabikorwa w' Akarere  Bwana  Alex Kanayoge.

Muri iyi nama, itsinda ry' abakozi ba MINECOFIN ryaririyobowe na Bwana Willson Twesigye ryagaragarije Abayobozi bayitabiriye Ingengo y' Imari y' Igihugu n' imishinga Nyamukuru izibandwaho muri uyu mwaka wa 2023/2024 n' ibikorwa by' ingenzi bizitabwaho. Itsinda rya MINECOFIN ryashyikirije Abanyamabanga Nshingwabikorwa b' Imirenge Udutabo dukubiyemo inshamake y' Imishinga nyamukuru iri mu ngengo y' Imari ya 2023/2024 banasabwa kuzabigeza ku baturage kugirango bajye bamenya ibikorwa na Gahunda za Guverinoma ( ibibakorerwa) no kubigiramo uruhare).

Iyi nama yitabiriwe n' Umuyobozi Ushinzwe Imirimo  Rusange  Bwana Alphonse Ntawumenyumunsi , Abayobozi b' Amashami, Abaperezida b' Inama Njyanama z' Imirenge , Abanyamabanga Nshingwabikorwa b' Imirenge n' Abakozi bashinzwe kubika amakuru ( Data Management Officers) ku Mirenge.

Mu ijambo yagejeje ku bitabiriye iyi nama, Umuyobozi w' Akarere yongeye gusaba Abanyamabanga Nshingwabikorwa kwihutisha ishyirwamubikorwa y' Imihigo, kwita ku isuku, kwimakaza ubumwe bw' Abanyarwanda, gukurikirana ibibazo by' ibikorwaremezo biba byarangiritse cyangwa byarahagaze bitagikora( urugero: amavomo), gutanga amakuru kandi ku gihe, kwihutisha itangwa ry' Ubwisungane mu Kwivuza bwa 2023/2024, gushishikariza abaturage bagituye ahantu hashyira ubuzima bwabo mu Kaga kuhimuka , kwihutisha ikemurwa ry' ibibazo by' abaturage n' ibindi.