Kuri uyu wa Gatatu, tariki ya 16 Kamena 2021, mu Karere ka Musanze hizihijwe Umunsi Mpuzamahanga w'Umwana w'Umunyafurika, kimwe n’ahandi mu Gihugu, ariko by’umwihariko  hanatangizwa ku mugaragaro Umunsi Ngarukagihembwe w'Imbonezamikurire y'Abana Bato (ECD Day). Insanganyamatsiko y'uyu Mwaka iragira, iti: "Isibo, Igicumbi cy'Imikurire Myiza y'Abana."

Ku Rwego rw’Akarere ka Musanze, ibi bikorwa byombi byabereye mu Isibo N⁰ 18 yitwa Inyamugayo yo mu Mudugudu wa Bukane, mu Kagari ka Cyabagarura, ho mu Murenge wa Umurenge wa Musanze, bikaba byari byitabiriwe n'Inzego zitandukanye iza Gisivile n'iz’Umutekano ndetse n'Abafatanyabikorwa. Umushyitsi Mukuru yari Umuyobozi w'Akarere Wungirije Ushinzwe Imibereho Myiza y' Abaturage, Madamu KAMANZI Axelle, wari kumwe n’Umukozi wa NCDA ku Rwego rw' Igihugu, Madamu IRADUKUNDA Diane.

Mu bandi bari bitabiriye harimo n'Umuyobozi w'Ishami ry'Imiyoborere Myiza mu Karere, Umuhuzabikorwa w’Inama y’Igihugu y’Abagore/CNF ku Rwego rw’Akarere, Umukozi Ushinzwe Uburinganire n'Iterambere ry'Umuryango n’Umukozi Ushinzwe Imbonezamikurire y'Abana bato mu Karere, Umufatanyabikorwa UWEZO, Abahagarariye Amadini n'Amatorero, bari bagiye kwifatanya n'abagore n'abagabo   batuye muri iriya Sibo.

Ibikorwa by'ingenzi byaranze uyu munsi bikaba byibanze ku gutegura indyo yuzuye, ibiganiro ku ku ruhare rw'abagize Isibo mu guteza imbere imikurire myiza y'umwana, kuzirikana Abana Bafite Ubumuga muri Gahunda Mbonezamikurire y'Abana bato. Uretse ibi biganiro, hanabaye ibikorwa byo gupima abana ibiro n'uburenure, gutanga ikinini cy'inzoka na Vitamini A ku bana, kugaburira abana indyo yuzuze no kubaha amata.

Ikindi cyashimishije kurushaho ni uko, ku ruhande rw’Abafatanyabikorwa, ECD ya ADEPR BUKANE yahawe ibikoresho bigizwe n’amakarito 10 y’amasabune n’impapuro z'isukubyatanzwe n'uyu Muryango Uharanira Uburenganzira bw’Abana n’Urubyiruko ERufite Ubumuga/UWEZO wavuzwe haruguru.

Mu butumwa bwatanzwe n'Intumwa ya NCDA yagarutse ku ruhare rw'Abagize Umuryango mu mikurire myiza y'umwana, kumurinda igwingira n'imirire mibi no kumuha uburere buboneye muri rusange ariko kandi abibutsa ko ibi byose bidashobora kugerwaho abatuye isibo batabigizemo uruhare, aho buri wese agomba kuba ijisho rya mugenzi we mu guharanira umuco wo kwigira bishakamo ibisubizo by'ibibazo runaka bihari.

Kuri iyi ngingo, ashimangira izi mpanuro, Umushyitsi Mukuru yagize, ati: “Mudufashe gukumira isambanywa ry'abana n'inda ziterwa abangavu,  kwita ku bangavu batewe inda no kubarinda gutereranwa ahubwo bagasubizwa mu ishuri kugira ngo aho kugira ngo bo n’abo babyaye babe ikibazo ku Muryangfo Nyarwanda babe ibisubizo mu bindi.”

Yasoje ashima uruhare rwa buri wese mu guteza imbere Uburenganzira bw'Umwana.