Kuri uyu wa Gatatu tariki ya 02 Werurwe 2022, mu Karere ka Musanze hatangiye Igikorwa cyo Gushakisha Imibiri y’Abatutsi Bazize Jenoside Yakorewe Abatutsi mu Rwanda mu 1994, bari bashyinguwe mu Rwibutso rwa Muhoza, izashyingurwa mu Cyubahiro mu Rwibutso Rushya rw'Akarere, rwubatswe ahahoze Inyubako z’icyari “Cour d’Appel ya Ruhengeri”, igikorwa kirimo kubera mu Murenge wa Muhoza, mu Kagari ka Ruhengeri, mu Mudugudu wa Byimana, ari naho izi Nzibutso zombie ziherereye.

Cyatangijwe n'Umuyobozi w'Akarere ka Musanze, Bwana RAMULI Janvier, wari kumwe n'Inzego z'Umutekano, bamwe mu Bagize Komite ya IBUKA ku Rwego rw'Akarere n'Umurenge wa Muhoza na bamwe mu bafite Ababo muri uru Rwibutso, Umuyobozi w'Akarere Wungirije Ushinzwe Imibereho Myiza y'Abaturage, Umunyamabanga Nshingwabikorwa w'Umurenge wa Muhoza, Ibitaro Bikuru bya Ruhengeri, Umuyobozi w'Ishami ry'Imiyoborere Myiza mu Karere n'abandi.

Mbere yo gutangira: Umunyamabanga Nshingwabikorwa w'Umurenge atanga ikaze

Mu ijambo rye ritangiza iyi gahunda, Umuyobozi w’Akarere wagize, ati: “Iki gikorwa dutangiye ni igikorwa gikomeye, gisaba kwihangana, ubwitange no kwigomwa, kigomba kugirwamo uruhare n’Inzego zose, haba mu gushaka iyi mibiri, kuyitunganya, kuba hafi uwagira ikibazo, kunoza imyiteguro yo kuyishyingura n’ibindi. Aha tukaba dushimira byimazeyo abahafite ababo biyemeje kuza ngo dufatanye uru rugendo.”

Umuyobozi w'Akarere ashimira abitabiriye anasobanura uko igikorwa giteye

Mu gikorwa nyirizina

Tubibutse ko aba Batutsi biciwe mu Cyahoze ari “Cour d’Appel ya Ruhengeri”, aho bari bakusanyirijwe bakuwe mu bice bitandukanye birimo n’Icyahoze ari Superefegitura ya Ruhengeri, ubu ni mu Karere ka Gakenke, babeshywa n’Ubuyobozi bwariho ko bahabahungishirije, nuko baburira ubuzima mu Nzu y’Ubutabera aho kuyirenganurirwamo, bajyanwa mu byobo byari inyuma gato y’iyo Nyubako byakucukurwagamo umucanga, ariho hari haragizwe Urwibutso rwa Muhoza.

Haguyemo Abatutsi bagera kuri 800 ariko amazina yashoboye kumenyekana kugeza ubu ni 88, ari nayo yanditswe kuri “Monument” yari yabaye yubatswe kuri urwo Rukiko mbere y’uko rugirwa Urwibutso, mu rwego rwo kubungabunga ibimenyetso; bityo hakaba hagikenewe amakuru k’uwaba aziamazina y’abandi baba baraguyemo kugira ngo haboneke uturonde rwuzuye. Muri Gahunda Ngarukamwaka yo Kwibuka, bibukwa ku itariki ya 15 Mata 1994, ari nayo tariki biciweho.

Aba niyo mazina amaze kuboneka

Iyi ikaba ari intera ikomeye cyane yishimiwe na buri wese, kubera ko muri aka Karere hari hasanzwe Inzibutso eshatu, uru rwa Muhoza, urwa Kinigi n’urwa Busogo, ariko zose zikaba nta na rumwe rwari rwari rwujuje ibiranga Urwibutso rwo ku Rwego rw’Akarere.

Bimwe mu bice bigize uru Rwibutso Rushya